آسفين يا أهل غزة

حد فاكر كلام الإنشاء اللي كنا كلنا بنتعلمه في المدرسة، وبنشوفه في تلفزيونا المحلي وأفلامنا الوطنية؟

مصر أم الدنيا، ومصر هي أمي، ومصر هي حمامة السلام وواسطة الخير بين البلدان العربية وهي الأهم في المنطقة العربية والشرق والأوسط وكل الكلام الجميل ده

كل ده خلاص راح من زمان في عهد حكومتنا الجميلة اللي خلت المواطن المصري ممسوح به البلاط في كل مكان على وجه الأرض من أكبر بلد لأصغر قرية... الحكومة أهدرت كرامة مصر وأصبح اسمهما على كل لسان (اللي يسوى واللي مايسواش) وآخر حاجة النهاردة الشتيمة بالأب والأم وحرق علمنا وكمان الدعاء علينا

أنا عن نفسي أخجل جداً من حكومتنا وموقفها السلبي جداً قدام اللي بيحصل على بعد أمتار مننا... وكمان لينا عين نقول إن حماس هي السبب في اللي حصل لأنها كانت بتضرب صواريخ في وقت التهدئة... تهدئة إيه بالضبط؟
شعب مقطوع عنه النور والمية والكهربا وكل الإمدادات الطبية والإسعافية والطعام، ولما يحب يعبر عن نفسه ويقاوم الظلم ده نقوله أنتم السبب في اللي بيحصل دلوقتي وإحنا حذرناكم قبل كده؟

الحكومات العربية حتقابل ربها بأي وش يوم الحساب؟
لغاية إمتى حنفضل زي الممسحة بيداس علينا وعلى كرامتنا في الرايحة والجاية... ليها إيه إسرائيل عندنا؟
خايفين منها ليه وعاملين لها ألف حساب؟
إزاي يتعمل مؤتمر صحفي قبل الضرب بيوم نقف ساكتين خالص فيه ةإحنا بنسمع تهديدات صريحة وشتيمة لغزة وعناصر المقاومة في حماس؟
قلبي بيتقطع وأنا شايفة مصر بتهدر كرامتها كل يوم وبنتشتم على إننا عملاء وخونة
وقلبي بيتقطع أكتر وأكتر وأنا شايفة عدد القتلى والشهداء اللي كان ممكن ولو بإحتمال 3 بالمائة إنهم يكونوا عايشين لو كنا عملنا حاجة

أنا بعتذر لكل فلسطيني حاسس إن مصر خانته وخذلته وكانت السبب في موت أهله وأحبابه... أنا حاسة طبعاً إن الإعتذار ده فات أوانه أوي وحجة بلهاء وكمان ملهاش لازمة... بس أنا فعلاً مش عارفة أقول إيه غير كده

ربنا يتوب علينا من الحكومات العربية والمصايب اللي جاية لنا من تحت راسهم... ويعين إخواننا في غزة... بجد أسفين جداً

!!!انزل الشوارع واتفرج على الفقر

اللهم إنا نعوذ بك من الفقر

كنت دايماً بستغرب جداً من وجود الدعاء ده في أذكار الصباح والمساء، وإني دايماً بردده ليل ونهار
طبعاً ربنا ما يكتب على أي واحد الفقر ولا مد الإيد والحاجة... بس على كده معنى إن إحنا بنستعيذ بالله من الفقر إني شيء كريه زيه زي الشيطان ... يعني عدو للبني آدم

وزي ما الشيطان بيغوي وبيخللي الإنسان يضل ويكفر، الفقر كذلك

المفروض كنت أكتب شيء عن الفقر بمناسبة اليوم العالمي للتدوين، وفعلاً كتبت شوية خواطر على المدونة التانية بتاعتي (الإنجليزي) بس ماكنتش عارفة حكتب إيه هنا خالص
فقلت أفضفض عن اللي مليان جوايا وعن الفقر اللي الواحد شايفه كل يوم حواليه لما خلاص قرب يتخنق

المفروض إني ساكنة في الدقي بس على العكس بطل من الخلف على منطقة بين السرايات... والمفروض إنها منطقة شعبية أو أقدر أقول من شكل المباني فيها وحال الناس اللي عايشين فيها إنها عشوائية... ولغاية دلوثتي نفسي أعرف فين السرايات دي اللي هي موجودة بينها... الإسم مش على مسمى تماماً
المهم بعيداً عن كل ده... الواحد بقى يشوف الفقر في كل حتة في البلد... يعني الزمالك جنبها على طول بولاق... المقطم في فيلات وعمارات فظيعة وفي نفس الوقت فيه مناطق على نفس الجبل زي الدويقة ومنشية ناصر... في المعادي وجنبها البساتين... في مصر الجديدة وإمتدادها تلاقي مجاهل عين شمس والسلام والمؤسسة ومساكن إسكندرية... العشوائيات والفقر بقى متفشي في كل حتة في مصر... والناس فالحة تروح تبني هايد بارك القاعرة الجديدة ومدينتي والرحاب وكريستال بلازا وتقولك هي دي العيشة اللي مفروض تعيشها
طب لما ناس غلابة أو حتى متوسطين الحال بيوفروا الأكل والسكن بالعافية ويشوفوا الإعلانات دي بيحسوا بإيه

مشكلة الفقر في مصر أكبر من مجرد مقالات وشعارات ضد الفقر وأرقام بيطلعها الجهاز المركزي للتعبئة والإحصاء... عدد الفقراء في مصر بيزيد كل يوم عن اللي قبله والفجوة اللي بين الفقراء والأغنياء بتوسع بشكل كبير جداً لدرجة إن مفيش حد حاسس بالتاني

اللي يضايق بقى كمان إن لما تكتب كلمة
Egypt
على أي محرك بحث
search engine
صور أو موقع صور زي
corbis
أو
Flickr
تلاقي معظم الصور إن ماكنتش لأهرامات ومعابد فلأحياء وعشوائيات فقيرة للغاية ومقالب زبالة وعيال حافية وعريانة ويكتب تحت الصورة ... الحياة اليومية في مصر، على أساس إن مصر مافيهاش غير الصور العشوائية دي، طبعاً مصر فيها كتييييير أوي بس المشكلة إن لما الناس تشوف الصور دي زيها زي غيرها بتروح مصوراها على طول... وبعده إحنا نقول إن الأجانب بياخدوا الصور دي علشان يسوئوا صورة مصر والمصريين والحضارة وكل كلام كتب التاريخ ده

بس الحقيقي إن الفقر كبر أوي و زبالتنا كترت أوي لدرجة إن في ناس تانية عايشة عليها
لغاية إمتى حتفضل الفجوة بين الفقر المدقع والغنى الفاحش تتسع كده؟؟
لغاية إمتى حيفضل في ناس عايشة في ملكوت تاني ومش حاسة إن الفقر بيزيد في مصر بمعدلات مرتفعة جداً، وإن فيه أسر كتير كانوا من الطبقة المتوسطة وقريب أوي مش حيلاقوا ياكلوا؟؟؟
يارب الناس تفوق
ياااااااارب

مدرس أول ثانوي وسواق تاكسي

كنت رايحة أتغدى عند جدتي لوحدي يوم الإثنين اللي فات الموافق 6 أكتوبر، وكنت لوحدي لأن علي كان بيضرب الأكلة المتينة عند حماتي ألا وهي (فشة وكرشة وكوارع) وهما عارفين كويس إني لو شميت الريحة قبل ما أخرج من الأسانسير ممكن أرجع ويغمي عليا فوراً

ولهذا السبب الجليل قررنا تطبيق نفس القرار الوزاري اللي طبقناه عند مشاهدة مباريات الأهلي مع الزمالك (فصل للقوات)، فلما نفسه تهف على الأكلة دي يروح ياكلها لوحده وأنا أروح أتغدى مع ماما وآنا (جدتي يعني، أصلي بقولها آنا) وبعدين نبقى نتقابل ونرجع البيت سوا

المهم خرجت لوحدى على الساعة 7 ونص بالليل كده بعد صلاة العشاء وركبت تاكسي من عند محطة البحوث لأن كان معايا كذا شنطة ومنهم شنطة اللاب توب ودي لوحدها زي الداهية على كتفي

فضل السواق ماشي في نفس خط السير المعروف وعند كوبري الجلاء جاتله مكالمة على الموبايل

آلووووو آلووووو أيوة يا حنان... ردي عليا يا حنان مش سامع حاجة... آلووووو

وواضح إن السكة قطعت بعدها
شوية والموبايل رن تاني

أيوة يا حنان... إيه مش سمعاني ولا إيه.. إزيك يا حنان... عاملة إيه يا ستي وإيه أخبار مصطفى وشيماء إحنا عندنا أجازة النهاردة... أيوة 6 أكتوبر إنتي عارفة بقى كل سنة وإنتي طيبة... الدنيا هنا زحمة أوي والجو حر، هو عندكم برضه حر؟

كده بقى أنا قلت أكيد بيكلم أخته أو بنته مثلاُ في بلد خليجي ولا حاجة... عادي يعني
وشوية وهو بيتكلم قال لحنان

تخيلي أنا لسة ما رحتش المدرسة ولا حضرت حاجة للعيال في الدفتر آه... أصل المدراس لما دخلت العيال ماجتش، قلت حروح أعمل إيه أهي أجازة بأجازة.. هو فيه حد حيروح المدرسة قبل العيد يعني، وبعدين تخيلي إني مكنش عندي وقت أحضر حاجة لغاية دلوقتي، مش عارف لما أدخل لهم بكرة حقول إيه... ربنا حيدبرها بقى من عنده

شوية وعدينا كبري قصر النيل وقربنا جداً من إشارة ميدان التحرير، فراح قايل لها

معلش يا حنان أنا داخل على ميدان التحرير وإنتي عارفة بقى قانون المرور الجديد، حركن بس على أي جنب ونكمل كلام، خليكي ما تقفليش السكة

شوية ولقيته بيوجه لي الكلام

معلش دي مراتي بتكلمني من الكويت أنا آسف لو أزعجتك، أصلها سافرت إعارة هناك وأخدت العيال معاها، هي بتشتغل مدرسة كومبيوتر على فكرة
فقلت له هو حضرتك مدرس برضه؟
أنا مدرس أول لغة عربية لثانوي وبشتغل على التاكسي ده باليل علشان يسليني لأني عايش هنا لوحدي
ربنا يبارك لك ويرجعهم لك بالسلامة
حتنزلي فين إن شاء الله؟
عند علامة المترو اللي هناك دي، أول السور الحديد
مع سلامة الله

وإديته الخمسة جنيه وأنا مكسوفة جداً... ده معلم ومربي أجيال، تخيلت الناس بتعمل إيه وبتكافح إزاي وبتستحمل إيه علشان تعيش في البلد دي... ده مش معناها إن سواقة التاكسي مهنة غير شريفة لا سمح الله ولا مهينة، أبداً بس الراجل ده مدرس أول والمفروض له وضعه في البلد اللي مش بتقدر المدرس والطبيب وتديهم مرتبات محترمة تكفيهم وتكفي أولادهم

الطريق كان قصير أوي وكان عندي كلام كتير أكيد كان ممكن أقوله للمدرس السواق، لكن أكيد حقابل ناس زي الراجل ده كتييييييييير وأقدر أسأل زي ما أنا عايزة

سلطة سيزر بالفراخ والجبن الشيدر

أنا آسفة طبعاً إني ما أبتدش أحط الوصفات الجديدة من أول رمضان... بس ما علينا إحنا دلوقتي في النصف الثاني ولسة فاضل 13 يوم على انتهاءه ودخول العيد وطبعاً لسة الواحد حيفضل محتار يعمل فطار إيه كل يوم

بجد الواحد ساعات كتير بيزهق من كتر التفكير وبيزهق أكتر لما الأكل مش بيكون متنوع ومجرد خضار وأرز ولحمة أو فراخ جنبهم...

في العشرة الأواخر من رمضان تحديداً الواحد ما بيكونش فاضي ومعندوش وقت كبير يقضيه في المطبخ بسبب التركيز في ختم القرآن وصلاة القيام والإعتكاف ومحاولة إنتهاز الفرصة والوقت في كسب ثواب العشر الأواخر

وعلشان كده قررت إني أحط وصفات خفيفة أوي مش حتاخد أكتر من نص ساعة أو 45 دقيقة في المطبخ... وكان أولهم النهاردة... سلطة سيزر بالفراخ.. أو زي ما نعرفها

Chicken Caesar Salad

وطبعاً لكل الي جربها في المطاعم والكافيهات وحبها بقدمها لكم النهاردة... وكانت التجربة الأولى الحمد لله ناجحة جداً ونالت إعجاب زوجي العزيز.. وطبعاً ده المهم

الأهم من كده إنها خفيفة على المعدة ومناسبة أوي لإفطار رمضان بعد تعب يوم من الصيام

(المقادير)

8 قطع صدور دجاج مخلي (بانيه)

3 أرغفة عيش فينو صغير Petit Pan

خس كابوتشي

زيت زيتون

جبنة شيدر شرائح

كيس صوص سلطة سيزر من كنور (يباع في جميع محلات السوبر ماركت) وثمنه جنيه واحد وفي بعض الأماكن جنيه وربع أو جنيه ونصف

مايونيز

8/1 كوب ماء

(أدوات مستخدمة)

ملعقة خشبية للتقليب

سكين حامي لتقطيع الفراخ وسكين لتقطيع العيش

طاسة تيفال لتحمير الفراخ

صينية تيفال صغيرة لتحميص العيش

ملعقة صغيرة وأخرى كبيرة

كوب متوسط

سلطانية كبيرة وعميقة

(الطريقة)

تكفي من شخصين إلى 4 أشخاص

* نفتح رغيف العيش الفينو من الناحيتين ثم نقوم بتقطيع كل وجه إلى مكعبات صغيرة أو متوسطة

* نضع مكعبات العيش في صينية صغيرة وندخلها في فرن درجة حرارته 180 لتحميصه ونتركه لمدة 10 دقائق أو 15 دقيقة حتى لا ينشف كثيراً وحتى يصبح مقرمش من الخارج وطري من الداخل

* نقوم بتقطيع صدور الفراخ إلى مكعبات متوسطة أو صغيرة ثم نضعها في طاسة بها القليل من زيت الزيتون الساخن على نار متوسطة ونقلب بالملعقة الخشبية حتى يصبح لون الفراخ ذهبي من كل ناحية... ولا نتركها كثيراً على النار حتى لا تنشف

* نغسل الخس الكابوتشي جيداً ورقة ورقة بعد نقعه في ماء بالخل ثم يشطف جيداً وينشف بفوطة ونقطع الخس قطع متوسطة الحجم بالأيدي

* نضع كلاً من الفراخ بعد تصفيتها من الزيت، والعيش المحمص والخس في سلطانية كبيرة وعميقة ونقلب الخليط

* في كوب منفصل نضع كيس من صوص سيزر من كنور ثم ثمن كوب الماء ونقلب وأخيراً نضيف 4 ملاعق مايونيز ونقلب الخليط جيداً ثم نصبه في طبق الفراخ والخس والعيش

* نقطع 4 أو 5 شرائح من الجبن الشيدر إلى قطع صغيرة ونضعها في طبق الخليط ثم نقلب كل المكونات جيداً حتى تتشرب الصوص تماماً ونقدمها كطبق رئيسي في الإفطار... وبالهنا والشفا

CSI النسخة المرعبة

على رأي المثل

اللي عدلت فيه شوية
PayPal على الــhackerيا مآمنة للرجال ... يا مآمنة للــ
إمبارح تعرضت مدونتي العزيزة للهجوم من قبل علي (زوجي العزيز) ومحمد أخويا، واستغلوا فرصة إني مستأمنة علي على الباسوورد بتاعتي وراحوا... هوووب، محملين صورة ليهم... شكلها يخض العفريت
صورة لو شافها أبطال مسلسل
CSI
حيعتزلوا التمثيل أو المخرج حيفكر يعمل نسخة جديدة للمسلسل زي ما عمل
CSI Miami
المرة دي زوجي وأخويا واخدين دور إتنين محققين زومبي، تأثراً بالأفلام المهببة اللي بيشوفوها زي
Resident evil
Doom's Day
اخيراً ده كان بمعاونة الزميل أحمد القطب اللي ساعدهم في تحميل الصورة دي ومش بعيد يكون هو اللي لقطها
أنا راضية ذمتكم... دي صورة عدلة تظهر على البلوج

وقفة صينية

شفت إمبارح الظهر حفل إفتتاح دورة بكين الأوليمبية… وبصراحة وبأمانة اتعقدت.. وحسيت بذل فظيع وإن إحنا لا مؤاخذة ولا حاجة.. وإن الصين خلاص قريب أوي حتغزو العالم... قريب أوي؟؟

دي فعلاً غزت العالم من زمان، كفاية كلمة

Made in China

اللي مرشقة في كل حتة وعلى أي حاجة

وأنا بتفرج على الإفتتاح الصيني العظيم ده، لقيت إني بكتب الكلام ده على لاب توب صيني وبتفرج على تلفزيون وريسيفر مكوناتهم صيني، وإن في الأوضة اللي أنا موجودة فيها بس ما لا يقل عن 100 شيء مصنوع في الصين

التعقيد اللي أصابني ماكنش بسبب حفل الإفتتاح بس، كان بسبب الفخر اللي كان على وجه كل فرد صيني قاعد بيتفرج في المدرجات، وكل صيني بيشارك في الإحتفالات، وأكيد كل صيني بيتفرج من بيته أو في الشارع

شعب، مش بس عنده حضارة قديمة زيها زي الحضارة الفرعونية (اللي ما حيلتناش غيرها نتفشخر بيها)، لأ دول كمان عندهم تكنولوجيا وتقدم مذهل، والأهم من ده كله طاقة بشرية مستغلة إلى أقصى درجة... شعب بيفتخر بعدده الكبير... مش محتاجين أي وقفة صينية، بالرغم من تعدادهم اللي عدى المليار و300 مليون نسمة

مفيش حكومة بتطلع تقولك إنتوا بتخلفوا كتير ليه... أو لو عايزين نتعلم كلنا، وناكل كلنا، ونتعالج كلنا، لازم نعمل وقفة (إستهبالية) ونحكم عقلنا، نبطل نخلف كلنا... هو بعد اللي الواحد شافه النهاردة عاد فيه عقل نحكمه؟

الصين اسمها جمهورية الصين الشعبية، يعني دولة قايمة على مجهودات الشعب وتقديسهم للعمل، صحيح هي دولة شيوعية وغير مؤمنة بالملكية الخاصة للفرد، لكن اسم الله بصراحة على أصحاب الأملاك هنا اللي خربوها وقعدوا على تلالها وبعدين نقول هي دي الديموقراطية وإن إحنا بلد بنشجع الإستثمارات الخارجية والعولمة والرأسمالية وبنوزع مواردنا وطاقتنا على اللي يشتري بأبخس ثمن... بنبيع البلد رخيص أوي، وده لأننا بعنا نفسنا قبل ما حكومتنا تبيع البلد

على العموم بعيداً عن السياسة والفقر والغلب والذل اللي إحنا عايشين فيه... خلينا نستمتع بالدورة التاريخية دي واللي ما بتجيش غير كل 4 سنوات وخلينا نتفرج إحنا حنجيب كام ميدالية السنة دي.. أملنا في ربنا كبير إن اللاعيبة يفرحونا وينصرونا، لأن مبقاش في حاجة تفرح في البلد غير الإنتصارات الرياضية، وأهي حاجة بنفلح فيها نوعاً ما

اللي الصين خليتنا نشوفه النهاردة يخوف.... كثرتهم وأعدادهم الخرافية دي مع الدقة المتناهية اللي كانوا بيتحركوا بيها بجد مبهرة بدرجة تخوف... الصين موجودة بقوة، وحنشوفها أكتر وأكتر الأيام الجاية

دي شوية صور من الإفتتاح (بدون ترتيب) اللي يارب تكونوا شوفتوه إمبارح، ولو لسة ماشفتهوش حاولوا تلحقوه في أقرب إعادة على قناة الجزيرة الرياضية

Beijing Olympic Games 2008

كالاماري مقلي

مين مش بيحب المأكولات البحرية؟
قليل جداً من الناس اللي مابيحبوش السمك والجمبري... طبعاً بغض النظر عن النباتيين... ولو إني أعرف نباتيين ما ياكلوش الفراخ واللحوم ومنتجات الألبان.. بس بياكلوا السمك

المهم بعيداً عن التصنيفات دي... أنا عارفة إني أتأخرت أوي أوي المرة دي في تقديم وصفة جديدة... وكنت قايلة من المرة اللي فاتت إنها حتكون مفاجأة... وزي ما وعدتكم... المرة دي حعمل خلطة مفتكسة شوية للكالاماري المقلي... ودي أول مرة أقدم فيها طبق بحري... وإن شاء الله مش آخر مرة... يللا شوفوا كده وابتدوا جربوا

المقادير

خمس قطع كالاماري* تم تنظيفه (ما يعادل كيلو إلا ربع تقريباً)

3 كوب ماء متوسط

6 ملاعق دقيق أبيض

مسطردة

كاري هندي

ملح

فلفل أسود

بصلة مبشورة

ثوم مفروم

زيت للقلي

3 أكواب دقيق أبيض (ما قبل القلي)

الأدوات المستخدمة

طاسة عميقة وكبيرة للتحمير

مقصوصة للتقليب

طبق سرفيس كبير عليه ورق مطبخ ليشرب زيت التحمير

كوبين لمعيار الماء ومعيار دقيق التتبيل

ملعقة طعام

مطحنة لفرم البصل والثوم

الطريقة

يغسل الكالاماري مرة أخرى جيداً بالماء ويصفى

يفتح بسكين حاد بحيث يصبح مستوياً ومبطط

يقطع بالطول لشرائح ليست بالعريضة جداً أو الرفيعة جداً زي ما بنشوفه معمول بالضبط

في سلطانية عميقة نضع 3 أكواب ماء وملاعق الدقيق ونقلبهم جيداً حتى يذوب الدقيق في الماء ويصبح الخليط متماسك قليلاً، ثم نضيف المسطردة ونكمل تقليب حتى يصبح لون الخليط أصفر غامق

نضيف البصل والثوم المفرومين، الملح، الفلفل الأسود، والكاري ونقلب جيداً

نضع الكالاماري المقطع إلى الخليط ونمزجه جيداً بيدينا حتى يصبح لونه مصفراً

نغطي طبق الخليط جيداً ونضعه في الثلاجة لمدة لا تقل عن ساعتين ولا تزيد عن 5 ساعات، ضروري جداً أن نغطي السلطانية أو الإناء العميق حتى لا تنتشر رائحة الزفارة في الثلاجة

نحضر أكواب الدقيق في طبق مسطح كبير (سرفيس) ونحضر الخليط من الثلاجة، ثم نضع الزيت على نار عالية

نغمر كل قطعة من الكالاماري بالدقيق على حدة ثم نضعها في الطاسة، ونكرر هذه العملية حتى تنتهي الكمية

نرفع الكالاماري عندما يصبح لونه ذهبياً ويوضع على طبق مسطح كبير (عليه ورق مطبخ) ليشرب الزيت

يقدم في طبق كبير مع سلطة طحينة أو أي صوص نحبه... وكده نقدر ننقنق براحتنا

وبالهنا والشفا... ياريت يا جماعة اللي يجرب يكتب لي تعليق ويقول إيه النظام

المرة الجاية مش حتأخر بإذن الله

* يباع كيلو الكالاماري بدءاً من 17 جنيه للكيلو وحتى 22 جنيه ويوجد منه المجمد (مستورد من الصين) والطازج في محلات الأسماك والسوبر ماركت.

بين السما والأرض

هل شاهدتم فيلم (بين السما والأرض) من قبل؟
رائعة المخرج صلاح أبو سيف التي دارت أحداثها في الأسانسير... فيلم كامل يعرض لنا طبيعة البشر حين يحتجزون في مكان ضيق، معلقين بين السما والأرض لساعات طويلة... كيف يتصرفون، كيف لا يحتملون بعضهم البعض... وكيف يظهرون على حقيقتهم... الحرامي، العجوز، الفنانة، النصاب، الخادم، مدعي الأرستقراطية... كيف يتحولون إلى ذلك الإنسان البدائي عندما يخاف الموت؟
كيف تسقط كل الأقنعة الحضارية التي يضعونها على وجوههم كي يتقبلهم المجتمع؟

دائماً ما كنت أنظر إلى هذا الفيلم على أنه فلسفي إلى أقصى درجة... بجانب الكوميديا السوداء التي برع صلاح أبو سيف بالطبع في تقديمها
بعد مشاهدتي لهذا الفيلم عدة مرات أصبح عندي هذا الخوف والهاجس من الأسانسير، ثم تحول هذا الخوف إلى رعب وهيستريا بعد مشاهدة العديد من أفلام الرعب أو حتى الأفلام العادية التي تضمنت مشاهد داخل الأسانسير

على سبيل المثال، هناك فيلم أجنبي غريب جداً كانت تعرضه قناة
MBC2
في أوقات متأخرة وغريبة اسمه
Elevator
أو الأسانسير (وهو أيضاَ من نوعية أفلام الكوميديا السوداء)... وتدور أحداثه حول كاتب شهير جداً وكبير في السن في طريقه لمغادرة مكتبه والذهاب لحضور حفل سيتم تكريمه من خلاله

وهو يغادر يحتجزه شاب يريد أن يعرض عليه سيناريوهاته الفاشلة في الأسانسير، لذلك يعطل الأسانسير لمدة لا تقل عن ساعة ونصف بعد إنصراف جميع العمال والأمن من المبنى.... لن أكمل لكم الفيلم بالطبع (لأنني لست من هواة حرق الأفلام) لكن يكفي أن بقاء الرجل مع الشاب في الأسانسير كل هذه المدة أصابني بعدم الراحة والخوف من هذا الصندوق المغلق وأنصح كل من يعاني من رهاب الأماكن المغلقة ألا يشاهد هذا الفيلم

أما الأكثر رعباً بالنسبة لي هو هذا المشهد من الجزء الأول من فيلم
Resident Evil
فيلمي المفضل عن الموتى الأحياء (الزومبي) حيث يتوقف الأسانسير بمجموعة من العاملين داخل مؤسسة أمبريللا ويبدأ في الصعود بسرعة جنونية والجميع يصرخون... ثم يتوقف فجأة... وهنا تأتي اللحظة الحاسمة حيث تتبرع واحدة (في قمة الشهامة والتضحية) بإخراج رقبتها وكتفيها الصغيرين من فتحة ضيقة تعاون جميع العاملين على فتحها.... وفجأة هووووب يبدأ الأسانسير في الصعود الجنوني مرة أخرى ليتوقف فقط عند رقبة الموظفة المتبرعة... (ويتوقف قلبي معها في المرة المائة لمشاهدة الفيلم)... يتنفس الجميع الصعداء... ثم هوووووب (حركة غدر من الأسانسير) وينزل بأقصى سرعة مصحوباً بالصراخ الهستيري .. وهوووب يتوقف كل شيء وتسود الشاشة... مشهد يجعل البدن يقشعر من مجرد ركوب الأسانسير والوصول للدور الأول

الأمثلة التي تثير رعبي من الأسانسير كثييييرة... لا تعد ولا تحصى سواء من خلال الأفلام والمسلسلات الأجنبية أو من قصص حدثت في الواقع سواء لصديق أو قريب أو حتى قرأتها في الجرائد
فإذا نظرت في تاريخ حياتك... أراهن أنك ستجد على الأقل قصة واحدة عرفتها جعلتك لا تحب الأسانسير أو أنك مررت بهذه التجربة المريرة ولا تحب بالتأكيد تكرارها مرة أخرى

ما جعلني أستحضر فكرة الخوف من الأسانسير هي التجربة التي تعرضت لها مع أسرتي منذ ساعات قليلة
كنا نشاهد أنا وزوجي علي مباراة نهائي
The Champions League
بين مانشستر يونايتد وتشيلسي في بيت حماي وحماتي، وكان معنا أبي وأمي وأخوتي... وظللنا ساهرين حتى الساعة الواحدة والنصف صباحاً... سلمنا على الجميع واتجهنا إلى الأسانسير... وكان ما كان

أصر أهلي على أن أركب أنا وعلي معهم لأن هناك متسع كبير والأسانسير واسع ويكفي هذا العدد.. ركبنا وأغلق علينا ثم هبط لأسفل (تعودت ألا اخاف من هذا الأسانسير، أولاً لأن حماي يسكن بالدور الثاني، وثانياً لأنه يشعرك بالأمان وليس لي معه أي سوابق سيئة)،.. فاجأني هذا التعليق السخيف الذي لا أدري لماذا أفلت من لساني "إيه كل العدد ده إحنا عاملين بالضبط زي فيلم بين السما والأرض، نياهاهاهاهاها" ذلك أننا كنا 6 أشخاص بالداخل

وكأن الأسانسير كان يسمعني وقرر أن يجرب كلامي على سبيل تزجية وقته واللعب مع بعض الركاب...وصل الدور الأول وتوقف ثم فتح تلقائياً وأغلق مرة أخرى ثم هبط إلى الدور الأرضي ولم يفتح (بالمناسبة هذا الأسانسير من النوع ذو البوابة المعدنية التي عليك انتظارها حتى تفتح أوتوماتيكياً وهو ما يجعله يرعبك أكثر)، وقتها شعرت بأن قلبي سيتوقف في أي لحظة... فأن يتوقف الأسانسير ولا يفتح ويعلق ما بين دورين لا يثير رعبي أما ما أثار هلعي أنه بدأ في الصعود مرة أخرى... وهنا تذكرت فيلم
Resident Evil
سيظل يصعد ويصعد ويصعد حتى يرتطم بالسقف... ياااااااااااه

أفلتت أعصابنا منا وبدأ كل واحد في لوم الآخر... فكرت أن أطلب محمد (أخو علي زوجي) على تليفونه النقال (موبايله يعني... لزوم الفصحى وكده)، لكن للأسف الشبكة لا تعمل... علي ليس معه رصيد... وبما أن جميعنا من مشتركي فودافون فإن الشبكة لا تعمل لدينا جميعاً.. ولكن من حسن حظنا أن موبينيل (تليفون بابا) تعمل داخل الأسانسير وطلب أبي محمد الذي قام بنداء البواب وتمت عملية الإنقاذ في 5 دقائق، ولكنهم مروا علي كنصف ساعة... خرجنا (على رأي أخويا) منه مثل منكوبي الزلازل... وسمعنا كلمات مثل ... حمد لله على السلامة.. حصل خير.. معلش

كان ما حدث جديراً بكتابة هذه التدوينة... وبتقديم أجزاء أخرى من حكايات الأسانسير
ولكن هذه المرة هناك دروس مستفادة... ألا وهي (بالبلدي كده) كالآتي

موبينيل شبكة المحمول الأولى جوة الأسانسير
لازم يكون معاك خط تاني لو عندك فودافون وبس
إوعى تسمع كلام أهلك وتركب أسانسير حمولته زايدة
!إوعى تقول إفيهات سخيفة وسمجة عن الأسانسير وأنت راكبه... لحسن يسمعك
إوعى تقول إفيهات سخيفة في العموم
لازم موبايلك يكون مشحون على طول للظروف الطارئة اللي زي دي
إوعى تتفرج على أفلام رعب فيها أسانسيرات
وأخيراً... فكروني أجيب خط إتصالات

سلام