ذكريات شم النسيم

النهاردة افتكرت إزاي كنا بنقضي شم النسيم مع ماما وبابا لما كنا صغيرين، وإزاي كان لينا طقوس لا نحيد عنها أبداً كل سنة... لكن للأسف كل الطقوس دي توقفت بعد ما كبرنا ودخلنا الجامعة وكل واحد بقى ليه حياته الخاصة... اللي بيسافر مع صحابه واللي بيروح سينما واللي بيفضل قاعد في البيت وهكذا...

كنا بنصحى من النوم بدري على الساعة 9 مثلاً أو 10 بالكتير، نلاقي ماما سلقت لنا كمية كبيرة من البيض الأبيض ومحضرة لنا الألوان علشان كل واحد يرسم الشكل اللي هو عايزه على البيضة بتاعته ... بس على شرط.. اللي يرسم على بيضة لازم ياكلها

وبالرغم من كرهي للبيض المسلوق تحديداً، إلا إني كنت بكسر القاعدة دي يوم شم النسيم بس... يعني البيضة برضه بيكون شكلها مغري... وبعدين بحط عليها ملح وكمون كتير فما بحسش بطعم الصفار أوي

كنت أنا ومحمد أخويا بنتنافس مين اللي بيرسم أحلى وبيستخدم ألون أكتر على البيضة بتاعته

غالباً كنت برسم بلياتشو أو راجل بشنب بريمة أو بنت بشعر أصفر وروج أحمر.. مش عارفة ليه... وساعات كنت بخللي ماما ترسم لي وشوش وأشكال... ولما كان محمد بيلاقي البيض بتاعي شكله حلو، ساعات كان بيخليني أرسم له

المهم لما بنخلص تلوين البيض كنا بنرصه، نتفرج عليه شوية، وبعدين نكسره علشان ناكله

بعد الأكل نجري ونلبس بسرعة علشان نطلع المقطم ونشوف القاهرة من فوق في الجو الجميل ده

كنا دايماً لما نطلع المقطم أخاف أوي أقرب من الحافة أو أبص تحتنا والعربية ماشية... بحس إن إحنا ممكن نقع في أي لحظة.... وبالرغم من كده كنت بحب الرحلة دي أوووي

غالباً بعدها كنا بنروح نادي جلاء اللي كان جنب بيتنا القديم في مصر الجديدة، أو بنروح عند جدتي وجدي (آنا وجدو) في التحرير علشان نديها أكلة رنجة بالبصل والطماطم والليمون... والحمد لله من صغري عمرنا ما دخلنا الفسيخ بيتنا أبداً لأننا بنكرهه عمى وما بنطيقش ريحته خااااالص... لكن الرنجة دي حاجة تانية خالص... مزاج عالي فعلاً

أما بالنسبة للمدرسة فكانت قصة تانية... لازم كنا نحضر لشم النسيم بعمل موضوع رسم عن رحلة قمنا بها مع أسرتنا في شم النسيم... ده غير الكارت اللي لازم نعمله ونلونه بنفسنا ولازم يكون بيحتوي على رسمة بيض ملون وأرنب... وأنا كنت فاشلة نوعاً ما في رسم الأرانب بس كنت بعمل كروت تحفة وماما كانت بتعلقها على الثلاجة

النهاردة وبعد ما اتجوزت... احتفال شم النسيم مختلف تماماً

ماما وبابا مسافرين الساحل مع أصحابهم

محمد وحسين قاعدين مع آنا في البيت

أما أنا وعلي فرحنا النادي وقضينا اليوم كله هناك في الشمس والجو الجميل... الدنيا كانت مليانة ناس مش الزحمة اللي تضايق الحمد لله وبعدين رحنا لجدتي بالليل وسهرنا معاهم

السنة الجاية بإذن الله حستعد إني أرجع طقوس شم النسيم القديمة تاني... بيض مسلوق، ألوان، رنجة، وبرضه إن شاء الله حنروح برضه النادي

من ميدان لبنان لآخر محيي الدين أبو العز

إمبارح كان عندي اجتماع شغل الصبح الساعة عشرة في ميدان لبنان. تحديداً في شارع المناجم والمحاجر... أيوة والله ده اسم الشارع.. أنا نفسي مش متخيلة مين اللي ممكن يسمي شارع موجود في المهندسين بالإسم العجب ده ... كان فيه مثلاً منجم فوسفات في المهندسين زمان ودفنوه ولا إيه؟؟؟

وبعدين تخيلت نفسي كده لو أنا ساكنة في الشارع ده وبدي لحد عنواني، أكيد حيسخسخ على روحه من الضحك وحيسأل عن سبب الإسم... المهم بعيداً عن الإسم، خلصت إجتماعي ونزلت عديت الشارع ومشيت من جنب كنتاكي وبيتزاهت.. شوية ووقفت علشان أعدي الشارع وأركب تاكسي ... طب حطلع على فين؟
مش عارفة فعلاً أركب إيه وأروح فين؟

حاسة إني عايزة أمشي مسافة طويييييييلة أوي زي ما كنت بعمل أيام الكلية وآخدها مشي من الجامعة في العباسية لغاية ميدان سانت فاتيما في مصر الجديدة ... شوفتم قد إيه؟

الساعة كانت لسة ماجتش 11 .... أرجع بيتي في الدقي ولا أرجع على بيت جدتي في التحرير ولا أروح المكتب عند علي؟

استقر رأيي إني أمشي لغاية ما رجلي توديني وأديني بسلي نفسي بالفرجة على المحلات والناس اللي ماشيين في الوقت ده ... وكان ليا ملاحظات كتير أوي خلال التمشية دي

أولاً لاحظت إن أغلب المحلات بتبتدي تفتح على الساعة 12 وبتكون تقريباً جاهزة لإستقبال الزبائن من بعد صلاة الظهر حسب التوقيت الشتوي ومبقتش محلات كتير بتقفل يوم الأحد زي ما تعودنا إن دي بتكون العطلة الأسبوعية بتاعتهم... قليلين أوي اللي كانوا قافلين

ثانياً عديت على حوالي 10 محلات شوكولاتة وورد فقط
وده طبعاً يدحض كل اللي بيتكلموا عن طوابير العيش وقلة أعداد أكشاك البيع والمخابز ... أهو يا جماعة محلات الشوكولاتة مغرقة الدنيا ... لأ وكمان إيه ... دول بيستعدوا لشم النسيم... يعني الشوكولاتة على شكل بيض وأرانب وأقل هدية من هناك تتكلفلها بتاع 200 جنيه ... ده على الأقل
عديت على (سويزا – لاروز – باشونيل – أوسوم – شوكو شوكولا – كورنيه دور... إلخ) وطبعاً بما إني مدمنة شوكولاتة فعينيا ومناخيري كانوا حيطلعوا ويبظوا قدام المحلات دي

ثالثاً اكتشفت إن فيه معهد مجهول كده اسمه (معهد المخطوطات العربية) وده موجود في شارع محيي الدين أبو العز وبيفتح من الساعة 9 الصبح... عرفت مكانه بس لأنهم حاطين ورقة مهترئة بشكل فظيع جوه إطار خشب ومقفول عليه بإزاز مليان ما لا يقل عن 500 عنكبوت في عشش عشوائية عايشين ومتكاثرين جوه، فلو بالصدفة معدي من جنبه وماشي على الرصيف وبحلقت كويس جوه الإطار ده... حتعرف إن في معهد... بفكر والله أعمل زيارة كده مرة وأشوف الناس دي بتعمل إيه؟

رابعاً معظم اللي ماشيين في الشارع في الوقت ده من كبار السن ... يعني الناس اللي اتعودت على الصحيان بدري وممارسة نشاطها... مش زينا بنمارس كل أنشطتنا بالليل. وأكيد معظمهم متقاعد وعلى المعاش لأن في الوقت ده كل الناس في أشغالها واالي في مدرسته واللي في جامعته
بس بجد أحلى حاجة إنهم يتمشوا كل يوم الصبح... دي حتى الحركة بركة

خامساً لما دخلت مترو ماركت اللي في شارع سوريا علشان أشتري حاجة أفطر بيها، لاحظت إن تلت تربع اللي جوة أجانب... لأ وإيه من جنسيات مختلفة تماماً ... كان فيه ست روسية وابنها (أعتقد إن ممكن يبقى اسمه "يفجيني" على رأي علي اللي معتقد إن كل الولاد الروس اسمهم كده)... وست طليانية وابنها عيل زي العسل كده اسمه "لوكاس" وست يابانية وأمها أو خالتها أو حد كبير في عيلتهم وخلاص... ماسورة أجانب وانفجرت... واضح إن دول اللي عارفين يعيشوا في بلدنا .. ما بيصرفوش بطاقة تموينية ولا بيقفوا في طوابير العيش

سادساً وأنا واقفة بحاسب على المشتريات اللي جبتها من مترو ماركت لقيت لوحتين متعلقين على الحيطة جوة برواز... دققت النظر شوية لقيتهم شهادات بتثبت مدى النظافة والصحة اللي بيتمتع بيهم المكان... قلت والله كويس يبقى المكان ماشي في السليم ومفيش حاجة فاسدة أو صلاحيتها منتهية الحمد لله
لكن لما دققت أكتر لقيت الشهادة الأولى بتاريخ 2004 وصلاحيتها 3 شهور فقط ونسبة النظافة والصحة 87%.... أما الثانية فكانت بتاريخ 2006 وصلاحيتها 3 شهور برضه، لكن المرة دي نسبة النظافة والصحة قلت وبقت 86% ... بجد ناس غريبة جداً... ومتفشخرين ومعلقينها... أولاً قديمة موووت، ثانياً وده الأهم النسبة قلت في السنة اللي بعدها

سابعاً وأخيراً أخدت الطريق في ساعة ونص تقريباً لأني كنت بتفرج على كل حاجة وبدقق في كل فاترينة... ده حتى دخلت
Club Aldo
أشوف صنادل وشباشب الصيف وكالعادة حسيت إنه مرطرط أوي ومصر كلها بتلبس من عنده... أنا مابمانعش على فكرة إني أجيب حاجة أو اتنين من عنده... بس ماتبقاش كل حاجتي كده.. يعني وجهة نظر بقى

أخيراً وصلت المكتب وقعدت أريح رجلي من المشي وعقلي من التفكير وعينيا من الفرجة على الفاترينات وعلى اللي رايح واللي جاي

أشوفكم بكرة

لفائف الدجاج بالخضار

بصراحة يا جماعة الطبق ده تحديداً بعتبره واحد من أفضل ما قدمت طبعاً علشان طعمه الفوق الرائع وقيمته الغذائية، والأهم من ده كله إني عملته لأول مرة وطلع وهمي كده يوم عيد جوازنا اللي قضيناه في البيت
اليوم ده تحديداً حبيت إني أطبخ حاجة نفضل فاكرينها وفي نفس الوقت ندوب في طعمها
وعلشان كده رفضت إن إحنا نتعشى برة الليلة دي

وبسبب جمال الطبق ده وبسبب المناسبة اللي عملته فيها، حبيت أشارك معاكم أجمل أطباقي
هذه الكمية تكفي شخصين فقط ويمكنكم طبعاً مضاعفة الكمية حسب العدد

المقادير

عشر قطع من الفراخ البانيه خالية الدهن
ثمن كيلو بسلة جاهزة
ست حبات جزر مقشر ومقطع صغير
خمس حبات بطاطس متوسطة مقشرة ومقطعة لحجم صغير
ربع كيلو جبن شيدر
ملح
فلفل أسود مطحون
زيت عباد شمس

الأدوات المستخدمة

طاسة تيفال كبيرة وعميقة
حلة ستانليس ستيل متوسطة
ملعقة خشب كبيرة للتقليب
طاجن بايركس صغير يكفي قطع الفراخ

الطريقة

توضع البطاطس والبسلة والجزر في حلة متوسط ممتلئة بالماء حتى نصفها... وتترك على نار متوسط لمدة 20 دقيقة، ثم تصفى الخضروات جيداً من الماء في مصفاة وتترك لتبرد ثم يتم رشها بالقليل من الملح والفلفل الأسود وتقلب جيداً

تفرد قطع الدجاج بشكل مستوي على سطح خشبي ثم نضع بداخل كل قطعة كمية بسيطة من الخضار حتى نتمكن من لفها وفي نفس الوقت تظل متماسكة

نقوم بلف كل شريحة من الدجاج جيداً بحيث تكون نقطة الغلق (إلتقاء مقدمة الشريحة بنهايتها) على القاعدة الخشبية من أسفل والتأكد من تماسك الخضار بداخلها

نضع الزيت في طاسة كبيرة على نار متوسطة ثم نضع الدجاج الملفوف جيداً، حتى تصبح نقطة اللف ملتصقة ببعضها البعض ثم نبدأ في التقليب (بعد إضافة الملح والفلفل الأسود حسب الرغبة) حتى يتم تحمير جميع الجوانب وذلك لمدة تتراوح من ربع ساعة إلى عشرين دقيقة على الأقل

نأخذ الدجاج الساخن ونرصه في الطاجن البايركس ونضيف ما تبقى من خضروات حوله ثم نصب باقي زيت التحمير على الخليط

نضع الجبن الشيدر بكميات كبيرة بعد تقطيعها على الدجاج، ثم نضع الطاجن في فرن متوسط الحرارة لمدة 20 دقيقة على الأكثر

يقدم هذا الطاجن من سلاطة الزبادي بالخيار أو صوص ثاوزند آيلاند (حنعرفها بعد كده) وبالهنا والشفا

ملحوظة عند تقطيع الدجاج بالشوكة والسكينة سيكون الخليط متماسك وطعم الدجاج يذوب في الفم
AMAZING

مستنية تعليقاتكم بشدة... شكراً

المرة القادمة إن شاء الله حتكون أكلة بحرية بطريقة جديدة... مفاجأة

إنفجار لمبة

يوم الجمعة اللي فاتت كنا سهرانين عند جدتي... كنا معزومين على أكلة رنجة واتفرجنا على فيلم
Vantage point
مع محمد وحسين.. كانت ليلة حلوة من الآخر روحنا من عندهم كده على الساعة 12 وربع وده يعتبر بدري بالنسبة للعادي بتاعنا

كالعادة دخلنا البيت وفتحنا نور المدخل وبعدين دخلت على أوضة نومنا بفتح النور يدوبك ولسة بدخل... لقيت النور بيطفي وينور بسرعة فظيعة وطاااااااااااااااااااااااااااااااااااااااخ... تشاااااااااااااامبش... اللمبة انفجرت
لمبة 100 وات لسة علي مركبها إمبارح وكان جايبها جديدة لانج... النجفة بتاعة أوضة نومنا بتشيل 300 وات وفيها 3 لمبات، يعني كل واحدة المفروض تبقى مية مش أكتر من كده يعني

المهم الإنفجار ده أصابني بالذهول لفترة وعلي اتخض عليا وجري ناحيتي بسرعة... مكنتش مصدقة إني كويسة ولسة سليمة وبخير

كان ممكن بمنتهى البساطة قطع من الإزاز تيجي في عيني أو وشي أو رقبتي، لكن الحمد لله ربنا ستر... الإزاز كان في كل حتة في الأوضة... على الأرض والسجادة والسرير وفوق التلفزيون والريسيفر وعلى ترابيزة المكوى وعلى الدولاب... ماسبش حتة ما وقعش فيها

طبعاً أنا وعلي قعدنا في رعب لمدة نصف ساعة

بعد كده علي راح فتح سكينة الكهربا (مش عارفة لغاية دلوقتي ليه بيقولوا عليها سكينة، وإيه علاقة الكهربا بالسكاكين؟؟؟)... لبسنا شباشبنا ودخلت تاني الأوضة علشان أجمع أشلاء اللمبة اللي انفجرت، وبعدين الباقي لميته بالمكنسة... بعدها علي جاب السلم وطلع يشوف النجفة

الدوايا خلاص باظت ولسة في بقايا إزاز رفيعة جوة النجفة... الموضوع محتاج لمبة ودوايا جديدة ... بس المرة دي ماتكونش صيني

دي على فكرة مش أول مرة تنفجر لمبة صيني عندنا... حصل الموضوع ده برضه قبل كده من كام شهر في نجفة السفرة، وعلي نجا بنفسه برضه

المهم إني افتكرت كل الحوادث اللي قريتها في الجرايد أو سمعتها عن إنفجار اللمبات الصيني الملونة في الأفراح والحفلات والصوانات... وده للأسف لأن كل محلات الكهرباء ما بتبيعش إلا اللمبات الصيني الأي كلام، وزي ما اكتشفت كده من الحادثة دي إن واضح إنها أنواع سيئة ومضروبة

أنا كنت عايزة أصور لكم اللمبة ونوعها علشان محدش يشتريها من أي كهربائي، بس لما ألاقي كاميرا حصورها على طول... ونصيحة كده مني ليكم... تجنبوا اللمبات الصيني تماماً.... حاولوا تدوروا على لمبات فرنساوي أو ألماني أو حتى مصري... أعتقد إن فيه لسة أنواع نضيفة زي (أوسرام – جنرال إليكتريك – فيليبس – نيازا)... يا جماعة بجد الحادثة دي الحمد لله عدت على خير، بس مين يعلم مش كان ممكن يكون في أطفال يتعرضوا للضرر أو بعد الشر الواحد كان ممكن يفقد عينيه وساعتها مش حيبقى له دية

يعني مفيش حد حيتحمل الضرر غير صاحبه ... لا الكهربائي، ولا المستورد ولا طبعاً الصين

لا للمبات الصيني ... خليك في المصري أحسن

حافظ على حياتك وعلى عينيك

إضراب إمبارح ... عملنا إيه؟

أخيراً جاء اليوم الذي انتظره الكثيرون... اضراب 6 إبريل

انتظر الجميع وجود شغب، انتظر الجميع مظاهرات ولافتات، ولكن الشوارع كانت هادئة نسبياً، حركة المرور قليلة، الكثير من المحلات المغلقة، وكالعادة أرجعت حكومتنا المبجلة هذا لوجود رياح وعواصف ترابية في جميع انحاء البلاد غير أن اليوم هو الأحد بالطبع وهو يوم إجازة المحلات التجارية

الحقيقة أن التراب لم يمنع أحد يوماً من الذهاب إلى المدارس والجامعات أو المكاتب، أما يوم الأحد فلم يعد الإجازة الرسمية للعديد من المحلات التجارية نظراً لضيق العيش بالطبع وركود القوة الشرائية لدى غالبية الناس لضيق ذات اليد ليس إلا

إذاً فالحركة المرورية السلسة التي كانت ملحوظة بالأمس كانت نتيجة لتفاعل بعض الأشخاص مع الإضراب والجلوس في المنازل، وذلك يتضح من الزحام المروري الذي تشتهر به القاهرة حالياً في جميع أيام الأسبوع

وعن مدى تفاعل الناس أمس... كان هناك من يمارس حياته بشكل طبيعي للغاية (الروتين اليومي)، وهناك من أغلق متجره أو لم يذهب إلى عمله أو لم يجازف بالنزول إلى الشوارع خوفاً فقط من المظاهرات والبلطجية والتكسير والضرب الذي قد يحدث.
وهناك من جلس في المنزل مضرباً عن النزول كموقف شخصي مساندةً للإضراب، أو من غير اسمه على الماسينجر أو الفيس بوك معبراً عن إضرابه... حتى أن هناك من شاهدته واضعاً لافتة بالإنجليزية على سيارته تقول

6 April the strike

هذا يوضح أن التفاعل كان مباشراً وغير مباشراً والنتيجة التي حصدناها هي خوف الحكومة من الإنفجار الشعبي الذي قد يحدث في يوم من الأيام نظراً للضغط الشديد الذي يعيش فيه المواطن كل يوم من غلاء أسعار وجوع وفقر وتدني مستوى المعيشة بجميع المقاييس وعلى جميع المستويات.. هذا الخوف يتضح من خلال التواجد الأمني المتوسع في الميادين الرئيسية مثل، التحرير، العتبة، عابدين، وسط البلد... بجانب المحافظات

ولعل أبرز المدن التي قامت بها مظاهرات أو لأكون أكثر دقة (إنتفاضة شعبية)، هي مدينة المحلة الكبرى التي تجمع بها حوالي 300 ألف مواطن قاموا بحصار قوات الأمن المركزي لحوالي 3 ساعات حتى جاءت قوات خاصة من خارج المدينة وبدأوا في الإشتباك وإطلاق الذخيرة الحية

أمس لم أفعل شيئاً، لم أخرج من المنزل تعبيراً عن الإضراب، ولكنني اضطررت للخروج السعاة العاشرة والنصف مساءاً وذلك بضغط من صديقتي شيرين وزوجي وأخي محمد... أرادوا أن يتناولوا العشاء في مطعم سبكترا بالمهندسين بعد أن تعرضوا لضغوط شديدة على مدار اليوم في تغطية أحداث الإضراب والإطمئنان على زملائنا الذين ألقي القبض عليهم وهم يجلسون في إحدى قهاوي وسط البلد بلا حول ولا قوة حتى أفرج عنهم مساءً

انتهى اليوم، ومازالت الأسعار كما هي، وأحوال الناس كما هي، ولكنها مجرد خطوة بسيطة... تحتاج إلى الوعي والتعريف قبل تكرار المحاولة مرة أخرى... تحتاج إلى المشاركة والشجاعة... تحتاج إلى جموع وأعداد غفيرة... فهل نكرر الإضراب مرة أخرى؟