سنة أولى جواز

إمبارح بالضبط أكون كملت أول سنة جواز... زي إمبارح بالضبط كانت حفلة زفافي أو زي ما كنت دايماً بسميه (ريسبشن صغير) وده لأنها كانت حفلة صغيرة أوي على الضيق

حاجات كتير أوي حصلت واتغيرت فيا على مدار السنة دي، منها إني اتعلمت إدارة البيت ... يعني إحتياجات البيت من أكل ونظافة وغسيل ومكوى.. ودي حاجات كانت منعدمة عندي تماماً قبل الزواج

نادراً ما كنت بدخل المطبخ مع ماما أو يدوب أقلي فراخ بانيه او أسلق مكرونة... لكن الحمد لله (وبشهادة علي زوجي العزيز) إني أستاذة ورئيسة قسم في عمل الأكلات والحلويات المبتكرة

دايماً الناس تقول إن أول سنة جواز هي أصعب سنة، فلو كانت دي فعلاً أصعب سنة فأكيد اللي جاي إن شاء الله حيبقى مفيش أسهل من كده ... على العموم أنا عمري ما توقعت السيء أو الأسوأ... هي بس بعض المشاكل اللي قابلت الواحد في الأول .. وحقولها علشان لو أي واحدة متجوزة جديد حست بيها ما تحسش إنها مجنونة وإن إحنا كلنا في مركب واحدة

(المشكلة الأولى) عدم التعود على البيت ... طبعاً بيت جديد ومش واخدة عليه إزاي فجأة ححس إنه بيتي.. بالرغم من إن الفرش والتصميم والألوان كلها على ذوقي وأنا اللي منقياها بس برضه ... أول أسبوع في البيت بيبقى عامل زي الحلم (الحلم الغريب ... لا وحش ولا حلو)... بيت اهلي واحشني، أوضتي وحشاني، دولابي بتاعي لوحدي ... دلوقتي كل حاجة في البيت مقسومة على اتنين ... حاجة تخض في الأول ... بس مع التعود الواحد بيحس بالراحة في كل حاجة وبالعكس .. بيت الأهل بيتحول لبيت غريب شوية والواحد بيبتدي يحس إنه مش قادر يبعد عن بيته ولا حتى جوزه

(المشكلة الثانية) الفشل الذريع في الطبخ وكل ما يخص المطبخ ... معظم البنات اليومين دول مش من نوعية ستات البيوت اللي مقطعين السمكة وديلها في عمل الأصناف المعتبرة والمحاشي والطواجن وده للإنشغال في المذاكرة وبعدها الشغل والطموح وحلم المرأة العاملة وبعدين الخروج والفسح والسينمات، فحنلاقي منين وقت لتعلم أي شيء، العريس مكنش واقف على باب المطبخ مستنيني أطلع أوريله خبرتي الفظيعة، هو الواحد كان آخره كوباية شاي أو نسكافيه ولو أبدع حبتين يبقى ماج كابتشينو برغوة ... ده قمة الإحتراف

أما المطبخ بعد الجواز فمأساة تانية خالص... كام صينية بطاطس اتحرقت والفاصوليا اللي شاطت .. ده غير الرز المعجن والفراخ النية والشوربة اللي عاملة زي نقع الغسيل والملوخية اللي غرقانة ملح

وبعد التجربة والفشل والتشجيع المستمر من الزوج المسكين اللي كنت بجرب فيه ... اتقنت حاجات كتير وكمان اخترعت أكلات .. وبقيت أستاذة دلوقتي

(المشكلة الثالثة) التوفيق بين البيت والشغل ... ولأني كنت بشتغل بدوام كامل في الأول وفي نفس الوقت لسة بتعلم الطبيخ وبتعلم مسئولية البيت والتنظيف والمكوى وكل الليلة دي، فده سبب لي إكتئاب شديد وإحباط في الأول، لكن بعد تعودي على كل الأعمال دي وتركي للدوام الكامل.... أقدر أقول إني ممكن أرجع أشتغل تاني ويبقى فيه توازن بين البيت والشغل

(المشكلة الرابعة) التعود على الطباع المختلفة... بعد قراءة كتب ومقالات كتيييييير موووت وسماع برامج وكلام من هنا وهناك والرجال من المريخ والنساء من الزهرة، وعاملي الرجل على إنه طفل كبير، والرجالة كلهم كائنات فضائية وأقصر طريق لقلب الرجل معدته

وكلام كتير من هذا القبيل .. أقدر أقول إن التجربة العملية مختلفة تماماً... علي بيموت في الجبنة وأنا بكرهها عمى لكن لازم أعملها لأنه ببساطة بيحبها ... علي بيحب البيض العيون وأنا بحبه أومليت... أنا بحب آكل بالشوكة والسكينة وعلي بيحب يغمس.. أنا بحب العيش الشامي وعلي بيحب البلدي

لكن علي بيكره البيتزا السي فوود وأنا كمان بكرهها .. وعلشان كده اتجوزنا ... مش أقصد علشان البيتزا طبعاً .. بس أقصد إن إحنا دورنا في الأول على النقاط المشتركة بيننا .. والإختلافات ظهرت بعد الجواز، لكنها ما دمرتش الحاجات اللي بنحبها سوا أو بنكرهها سوا... الإختلاف لازم ولابد منه... ماحدش يتوقع إنه يتجوز النسخة بتاعته يا إما الحياة حتكون مملة أوي وفي نفس الوقت كل شيء بييجي بالتعود والتنازل مهم .. والحياة الزوجية أخد وعطاء والعطاء بيكون قبل الأخد ... وكل الليلة دي

(المشكلة الخامسة) الإستقلال التام والموت الزؤام... كان الواحد متعود إن الزيارات العائلية هي مسئولية بابا وماما، بما فيها تليفونات التهاني بالزواج والحمل والمولود السعيد والنجاح والعيد الصغير والعيد الكبير وعيد العمال ويوم المرأة وعيد الأم والأخ والجد، ده غير فلوس الهدية... كل الأيام دي كان الواحد ولا بيسأل فيها... بعد الجواز الواحد بيكتشف إنه عليه مجاملات لعدد مهول من الناس وبالذات اللي جم زاروه في بيته وجابوا له هدية بالشيء الفلاني أو حتى اللي قريبين منه من غير هدايا... المجاملات دي محتاجة مبالغ خرافية بدايةً من الزيارة نفسها اللي حتتكلف تاكسي رايح وتاكسي جاي ده غير الهدية اللي لازم تكون لايقة بمقامنا ومقام الناس اللي بنزورهم أو دستة جاتوه أو تورتة (على الأقل من لابوار أو ساليه سوكريه)... ده طبعاً غير التليفونات والتهاني على الفيس بوك والماسيجات... يعني كله فلوس في فلوس... وطبعاً بما إن أول سنة بتكون أعسر سنة مادياً ... ففي مجاملات كتير جدااااااااً لسة ماعملنهاش.. ومنها عدد 5 حالات مولود جديد... عدد 3 عيد ميلاد... عدد 2 جوازات جديدة... يعني من الآخر ميزانية كذا شهر قدام.. وربنا يستر ومحدش يتجوز تاني قريب.. كفاية علينا الأعياد

(المشكلة السادسة)... خلاص مفيش حاجة تاني على حد علمي.. أو على حد تجربتي

دي كانت معظم الحاجات اللي قابلتها في أول سنة جواز .. والحمد لله اجتازناها سوا على خير.. وعلى العموم لسه أكيد حنكتشف حاجات جديدة .. حبقى أتكلم فيها بعدين... يللا سلام

لحم محمر بالبطاطس والبصل

بالرغم من عدم حبي الشديد للحوم الحمراء بوجه عام، إلا إن بعد زواجي اتفتحت شهيتي لحاجات كتيرة أوووووي ومنها اللحمة، وللأسف اللحمة البتلو، اللي هي أغلى نوع لحمة طبعاً، وده لأني بكره أي دهون وده برضه السبب اللي بيخليني أكره الضاني موت موت مووووووت

اشتريت الشهر ده كيلو بتلو شرائح (في ظل غلاء الأسعار طبعاً دي تعتبر معجزة) ومكنتش عارفة ممكن أطبخها إزاي غير إني أعمل السكالوب (في أقوال أخرى البفتيك)، وبعدين قلت أجرب طريقة مفتكسة كده ولو طلعت حلوة حبقى أشاركها معاكم

الحمد لله طبعاً، نجحت جداً وما أخدتش غير 30 دقيقة في عملها وده طبعاً لأن البتلو غير أي نوع لحم، من مميزاته إنه بيستوي بسرعة... يللا جربوها وقولوا لي رأيكم

وصفة اليوم – لحم محمر بالبطاطس والبصل

تكفي من 2 إلى 3 أشخاص

المقادير

3 حبات بطاطس كبيرة

7 شرائح من اللحم البتلو (خالي الدهن طبعاً)

بصلة حمراء كبيرة

زيت عباد شمس

ملح

فلفل أسود مطحون

الأدوات المستخدمة

طاسة تيفال كبيرة وعميقة

ملعقة خشب كبيرة للتقليب

سكين حاد للتقطيع

قشارة

لوح للتقطيع

الطريقة

نضع كمية بسيطة من زيت عباد الشمس في الطاسة ونفتح عليها نار متوسطة

نقشر البطاطس، نقوم بغسلها، ثم تقطيعها لمكعبات صغيرة، ووضعها في الطاسة بعد أن يسخن الزيت أي بعد حوالي دقيقتين

نقطع شرائح اللحم البتلو إلى قطع أصغر بالطول ثم نضعها في الطاسة مع البطاطس بعد أن تكون قد احمرت قليلاً

نقلب المزيج حتى تصبح البطاطس واللحم محمرتين، ثم نضع قطع البصل الصغيرة بعد أن قطعناها

نضيف الملح والفلفل الأسود حسب الرغبة ونقلب المزيج جيداً لمدة خمس دقائق حتى يصبح جاهزاً

نقدمه ساخن بجانب الصوص المفضل ... صويا، باربكيو، أو ثاوزند آيلندز

مارو .... افتح بقه الجميل

مارو ... فتاتي المفضلة
بطة صغنونة يدوبك عندها سنة وكام شهر ... والأهم من ده إنها بنت لبنى ... من أعز وأجدع أصدقائي، يعني من الآخر ماريا لازم تكون بنوتة مميزة وليها معزة خاصة (وخروف خاص برضه)... ما شاء الله عليها ربنا يحميها

المهم... لبنى في بعض الأحيان (وأغلب الأحيان برضه) بتجيبها الشغل معاها، ودي من أحد المميزات العظيمة للمكان اللي بنشتغل فيه، الصفة الوحيدة اللي إحنا فيها نشبه جوجل... وطبعاً أكتر حاجة ممكن تأرق أي أم عاملة إنها تسيب عيالها في السن ده حبة في حضانة أو مع دادة أو حد من الأصدقاء الفدائيين أو الجيران أو الأقارب.. وهكذا، وده خاصةً لو الشغل بيتاخر وفي بعض الأحيان يوصل لغاية الساعة 8 و9، بس الحمد لله مش بعد كده أوي

أول امبارح لبنى اضطرت ولأول مرة إنها تطلع تعمل مشوار بعد الشغل وكان لازم تسيب ماريا معانا أنا وشيرين
طبعاً الطبيعي طول اليوم إن ماريا بتتجول بين المكاتب وبتقعد عندنا كتير، لكن المرة دي لبنى معاها العربية وراحت مشوار وسايباها لنا مسئولية وأمانة وكل اللي ممكن تتخيلوه مع اتنين ملهومش في العيال خاااااااااااااااالص
أنا وشيرين

المهم طبعاً مغامرات من الجري والشيل والغناء والرقص والتصقيف، وفي الآخر كان واضح إنها جعانة ومالقيناش أي شيء يتاكل ويكون صالح لسنها. فضلت مارو قافشة في واحدة معمول وعايزة تفتحها بأي شكل... المهم توكلنا على الله وقلنا يللا نفتحها واللي يحصل يحصل، إن شاء الله خير، يارب ما يطلعش تقيل أوي على معدتها الميني سايز

هي شافت المعمول من هنا وابتسامة رائعة ظهرت على وشها... يدوب كنت بقول افتح بقه الجميل يا مارو ... تروح فاتحة بقها على الآخر وهي بتضحك وتشد في إيد شيرين اللي أنا حطيت فيها حتة صغنونة من المعمول

إيه رأيكم بقى في صورة مارو وهي بتاكل؟؟؟

دليل البنات في استخدام الحمامات

كم مرة اضطررتِ فيها لاستخدام الحمام خارج المنزل.. في العمل، الجامعة، المدرسة، المطعم.. وحتى الصحراء؟

بالتأكيد صادفتِ العديد من تلك المواقف منها ما يحدث بشكل يومي ومتكرر، ومنها ما يحدث في مواقف (الزنقة) في الصحراء أو في الشارع، فهل تتخذين الاحتياطات اللازمة من ورق تواليت، وأدوات نظافة والذي منه؟.. ولو كان المكان الذي اضطررتِ لقضاء حاجتك فيه قذراً، هل فكرتِ كيف تجعليه نظيفاً بقدر الإمكان للاستخدام الآدمي، وإذا كان نظيفاً كيف تحافظين على نظافته؟

لكل ما سبق من أسباب نقدم لكل فتاة وسيدة، آنسة أو مدام، دليل متواضع لكيفية استخدام الحمامات القذرة بطريقة نظيفة.. والحمامات النظيفة بطريقة.. أيضاً نظيفة

الشنطة دي فيها إيه؟

الشنطة تعتبر من أهم الأكسسورات التي تحملها كل سيدة وفتاة، ليس لمظهرها وجمالها، أو حجمها سواء صغير أو كبير أو حتى ماركتها.. ولكن بجوهرها أي محتوياتهامن الممكن أن تكون شنطتك هي المنقذ الوحيد لكِ في مواقف (الزنقة)، فمن الأشياء الأساسية التي يجب أن تأخذيها معكِ دائماً تحسباً للظروف

مناديل ورقية *

سبراي عطري *

Body Splash

مناديل معطرة *

Wipes

صابونة صغيرة داخل علبة بلاستيك محكمة الغلق *

زجاجة ديتول صغيرة *

أكياس نايلون صغيرة مطوية حتى لا تأخذ مساحة كبيرة، وهناك أكياس لاستخدام التواليت تباع في السوبرماركت *

هذه الأشياء سوف تضمن لكِ نظافتك الشخصية، ونظافة المكان الذي سوف تستخدميه سواء قبل الاستخدام أو بعد الاستخدام

حمام نظيف .. فين؟

كثيراً ما يكون حمام الجامعة أو مكان العمل مقززاً وغير صالح للاستخدام الآدمي تماماً، أي لا يمكن قضاء الحاجة فيه حتى بعد التنظيف، سواء بسبب الرائحة أو المنظر العام، وفي أحيان أخرى قد تكونين في مكان ما في الشارع، تتسوقين، أو تقضين بعض الطلبات، وفجأة احتجت إلى الحمام، ولكن أين؟

أقول لكم أن أفضل الأماكن للحالتين السابقتين هي حمامات مطاعم التيك أواي أو حمامات المولات أو حمامات المساجد الكبرى لأن للأسف ليست حمامات المساجد جميعاً نظيفة

هذه الأماكن دائماً هي الأنسب والأكثر نظافة، فمثلاً إذا كان لديك مبلغاً ولو بسيطاً من المال، يمكنك شراء أي ساندويتش أو مشروب من المطعم واستخدام الحمام بتلك الحجة، أما إذا كان المكان مزدحماً، فلن يلاحظ أحد دخولك وخروجك من الحمام.. أما المساجد والمولات فلا يوجد أي حرج بالطبع

زنقة على الطريق

الرحلات والمسافات الطويلة دائماً تستدعي دخول الحمام، ودائماً ما تتعرضين خلالها لمواقف محرجة.. توجد أماكن على الطريق يمكن التوقف عندها لاستخدام الحمام مثل الرست هاوس أو واحة عمر وغيرهما.. ومن أكثر الطرق المزودة بكافة أنواع الحمامات هو طريق القاهرة- الإسكندرية الصحراوي حيث تتوفر جميع أنواع الحمامات، النظيف منها و القذر

أما طرق الواحات والبحر الأحمر والساحل ومطروح.. فوجود حمام نظيف على الطريق شيء مستحيل، أما وجود حمامات ما بين كل 50 كيلومتر فهو خيالي تماماً، ولذلك قد تكون الصحراء هي الحل الوحيد في المواقف شديدة الصعوبة بالنسبة لسيدة أو فتاة

فقط عليك عدم التوغل في الداخل كثيراً والاستعانة بصديقتك أو والدتك أو أختك، واستخدام السيارة – إذا وجدت- كحائل بينك وبين الطريق، ولا تنسي أدوات النظافة وزجاجة المياه.. وربنا يبعد عنك شر العقارب والحشرات

حمام بلدي ... يععع

تواليت، دبليو سي، فستيير.. بالتأكيد سمعت تلك المصطلحات من قبل.. لكن هل سمعتي عن "الحمام البلدي" أو استخدمتيه قبل كده؟

هو مجرد نوع من أنواع التواليتات مغروس في الأرض ويستدعي الاقتراب من الأرض وجلوس القرفصاء، كثير من الفتيات لا يعرفن كيفية استخدامه نظراً لصعوبة هذا الوضع- أما بالنسبة للرجال فهو لا يمثل مشكلة بالمرة، وكثيرات لم يسمعن عنه من قبل- وعندما رأينه للمرة الأولى إما أصابهم الذهول المصحوب بالتقزز أو الإغماء المصحوب أيضاً بالتقزز

الحمامات البلدي موجودة في أماكن نظيفة كثيرة مثل الحرم النبوي والحرم المكي، المساجد الكبرى في تركيا وبلدان إسلامية كثيرة وبعض المطارات، ولكنها مزودة بجميع أدوات النظافة.. حيث يوجد سيفون أعلى الحائط يمكن شده بسهولة، ورق تواليت، حنفية ماء قريبة من الأرض ومعها دلو صغير للتشطيف (كوز)، وسلة مهملات.. هذا بجانب وجود سيدة تقوم بالتنظيف بالمطهرات والمعطر بعد كل استخدام، وبذلك يبقى الحمام البلدي نظيفاً

إساءة استخدام

النظافة الشخصية والنظافة العامة طبع ينمو معنا من صغرنا حيث نتصرف دائماً على حسب ما تعودنا على رؤيته في بيوتنا، ولكن هناك من الفتيات والسيدات من تسيء استخدام الحمام بطريقة لا تسمح لأي استخدام آدمي من بعدها مثل ترك مياه قذرة في جميع أنحاء الحمام، عدم "شد السيفون"، رمي الفضلات في التواليت أو على الأرض، ترك قاعدة التواليت والشطاف بحالة قذرة

لذا، حتى لا يتأذى أحد من بعدك، وحتى تتمكني من استخدام الحمام بطريقة نظيفة يمكن عمل الآتي

إذا كانت الأرض قذرة يمكن أن تثني البنطلون إلى أعلى أو إذا كنتِ ترتدين جيبة فيمكن رفعها وشبكها في وسطك، وذلك حتى لا تتسخ ملابسك

تأكدي من وجود شطاف يعمل وحددي مكانه، حيث أن هناك أنواع كثيرة منها داخل التواليت نفسه، ومنها معلق بخرطوم مياه منفصل.. وحاولي ألا يلامس الشطاف جسدك بأي وسيلة

تأكدي من وجود سيفون يعمل وقومي بشده أو الضغط عليه بعد الاستخدام

إذا كنتِ في أحد البلدان الأجنبية، فهم لا يستخدمون أي مصدر مياه للتشطيف ويكتفون بورق التواليت (يععععع) ولذلك تأكدي من دخولك الحمام بزجاجة مياه

تأكدي من رمي ورق التواليت والمناديل أو أي فضلات أخرى في سلة المهملات بطريقة نظيفة أي بعد وضعها في كيس نايلون صغير، أو لفها في ورقة جورنال أو ورق تواليت نظيف، وذلك حتى لا يتأذى أحد من المنظر

قبل الخروج من الحمام افتحي الشباك والشفاط (إذا وجد)، وإذا كان معكي سبراي معطر فقومي ببخه في الهواء.. وذلك حتى لا يتأذى أحد من الرائحة

أخيراً حاولي تجنب الأكلات والمشروبات التي تجعلك تحتاجين لدخول الحمام كثيراً خارج المنزل.. وربنا يبعد عنكِ شر الزنقة

بطاطس محشية باللحم المفروم

المكونات

بطاطس من الحجم الصغير أو المتوسط - 18 واحدة
كوبان لبن كبيران
ملح
فلفل أسود مطحون
زبدة أو سمنة بلدي
زعتر ناشف
قرفة
بهارات
كمون
سبعمائة وخمسون جرام لحم مفروم صافي
مسطردة
مايونيز
نعناع ناشف

الأدوات المستخدمة

صينية بايركس كبيرة وعميقة
مقورة
قشارة
مبشرة
حلة ستانليس متوسطة
طبق أو سلطانية عميقة متوسطة أو كبيرة
ملعقتين كبيرتين

الطريقة

يتم تقشير البطاطس وغسلها بالماء لتنظيفها ثم باستخدام المقورة يتم تقوير البطاطس من أعلى نقطة فيها، ولكن حتى المنتصف فقط حتى لا تصبح مفتوحة من الجانبين وحتى نتمكن من حشوها

توضع البطاطس في الصينية البايركس قبل حشوها

توضع ملعقتين سمنة أو زبدة كبيرة في الحلة الستانليس على نار هادئة حتى تسخن ثم يوضع البصل (بعد أن يتم بشره في طبق منفصل) مع الزبدة ويقلب حتى يصفر البصل

يوضع اللحم المفروم في الحلة ويقلب لمدة 10 دقائق أو 15 دقيقة حتى يجف ماء اللحم المفروم وذلك على نار هادئة

توضع ملعقتان مايونيز وملعقتان مسطردة كبيرتان ثم رشة فلفل أسود وملعقة صغيرة ملح ويقلب اللحم حتى تكتمل تسويته

في طبق عميق منفصل يتم وضع كوبي اللبن وعليهما رشتان ملح ورشتان وعتر ناشف ورشة فلفل أسود، وكمون، وقرفة، ونعناع ناشف، وبهارات... ثم تقلب جميع المكونات حتى تندمج تماماً

نقوم بحشو البطاطس باللحم المفروم المعصج والضغط بقوة داخل الثمرة ثم نقوم برص البطاطس بعد حشوها في الصينية البايركس

نصب اللبن الممزوج بالتوابل على البطاطس المحشوة حتى تمتلئ نصف الصينية وتوضح بواقي البطاطس التي قمنا بتقويرها في أنحاء الصينية مع تغطيتها بنفس خليط اللبن

توضع الصينية في فرن درجة حرارته عالية لمدة 35 دقيقة حتى 50 دقيقة حسب الفرن والتأكد كل 15 دقيقة من تسوية الطبق ويمكن إضافة قطع من الجبن الشيدر أو جبن بارميجان مبشور قبل دخول الصينية الفرن حسب الرغبة

بعد إخراج الطبق من الفرن يرش عليه القليل من البقدونس أو الجبن المبشور من أي نوع تفضلونه ... رومي، شيدر، أو بارميجان، ثم يقدم على طاولة الطعام

وبالهنا والشفا

في عز البرد والمطر ... فرحتونا الله يفرحكم

مصر أذهلت الكاميرون
فوز مصر المتوجة على عرش الكرة الأفريقية
الفراعنة يروضون أسود الكاميرون في بداية مشوارهم للحفاظ على اللقب

كل دي كانت عناوين رئيسية على مواقع رويترز، يوروسبورت، البي بي سي، وكالة الأنباء الفرنسية، وأخبار جوجل ... بجد الفرحة مش سايعاني ... ومش مصدقة لغاية دلوقتي إن اللي كانوا بيلعبوا دول فريقنا ... مصر .. أبطال كاس أفريقيا 2006 ويارب السنة دي كمان (غانا 2008) نفضل بنفس مستوى النهاردة ونقدر نحافظ على اللقب
مش حتكلم كتير عن المباراة، كنت بس عايزة أقول إن الفريق النهاردة كان فوق الممتاز، متماسك جداً
Relax
سريع في الجري
بيلعبوا لعب مزيكا م الآخر

أما محمد زيدان ... فربنا يحميه ويخليه لينا .. أهي دي اللعيبة بجد
يارب نفضل كده
النتيجة النهاردة في أولى مباريات المجموعة الثالثة بين مصر والكاميرون كانت (4 – 2)، يوم السبت مباراة مصر والسودان والأربعاء 30 يناير حيكون مصر مع زامبيا ... أتابع معاكم المبارايات الجاية وأسيبك مع شوية صور تفرح القلب

خضار سوتيه مشكل بالذرة الحلوة

بصراحة ومن أولها كده ... الوصفة دي أنا ما اخترعتهاش ولا حاجة، مرات خالي كانت بتعملها في العزومات ودقتها وعجبتني أوي ... وبعدين فكرة الحلو على الحادق بنسب معينة طبعاً بيكون طعمه وهمي (Sweet and Sour) ... المهم إني جربت أعملها في مطبخي ونجحت الحمد لله .. وعلشان كده قلت أشارككم فيها .. جربوا تعملوها وادعولي

(هذا الصنف يكفي 4 أشخاص)

(المقادير)

كوسة مقشرة ومغسولة ومقطعة شرائح
جزر مقشر ومغسول ومقطع شرائح
بسلة (ربع كيلو أو نصف كيلو) حسب الرغبة
فاصوليا طويلة مقطوع أطرافها فقط ومغسولة جيداً (ربع كيلو أو نصف كيلو)

خمس حبات بطاطس كبيرة يتم تقشيرها، غسلها، وتقطيعها قطع صغيرة
علبة مشروم صغيرة أو متوسطة (Mushroom)
علبة ذرة حلوة صغيرة (Sweet Corn)
ملح
فلفل أسود مطحون

(الأدوات المستخدمة)

سكين حاد لتقطيع الخضروات
مقشرة / قشارة
ملعقة كبيرة للتقليب
حلة ستانليس ستيل كبيرة
فتاحة علب

(الطريقة)

توضع جميع الخضروات في الحلة الستانليس

يضاف المشروم بعد أن يصفى من ماءه الموجود بالعلبة

يتم وضع كوب واحد كبير من الماء ثم تغطى الحلة جيداً وتترك على نار عالية حتى يغلي الماء ويتكثف البخار

يتم زيادة نصف كوب كبير ماء مغلي على الخضروات وإغلاق الحلة ثم الانتظار حتى يتبخر جميع الماء الموجود بالداخل بدون أن تكون الخضروات مهرية وذلك على نار هادئة

تصفى جميع الخضروات جيداً من أي بقايا ماء ثم يرش الملح والفلفل الأسود حسب الرغبة ويقلب

تضاف أخيراً الذرة الحلوة بعد تصفيتها من الماء الموجود بالعلبة ويقلب المزيج كله مرة أخرى

توضع الخضروات في طبق كبير للتقديم ... وبالهنا والشفا
جربوا الوصفة وابعتوا لي تعليقاتكم

!سبعة فوق ... وسبعة تحت

كل الناس وكل الصحف والمجلات والبرامج في بداية السنة بيكتبوا ويقولوا نفس الكلام بتاع كل سنة

السنة دي أحسن من اللي فاتت ... حصاد العام .. نفسك تعمل إيه السنة دي ومعملتهوش السنة اللي فاتت ... تحب تقول اللي زعلتهم أو فرحتهم إيه ... مين نفسك يكون موجود معاك السنة دي .. أمنيات العام .. سهرت فين ليلة راس السنة

بصراحة لو كل واحد احتفظ بالكلام ده، ممكن يعمله كوبي وبيست السنين الجاية لأنه ما بيتغيرش .. ساعات المحتوى بيتغير .. بس عامة لو ركزنا شوية حتلاقي إن أمنيات الناس متقاربة أوي

كل واحد أكيد بيتمنى ولو واحدة من الأمنيات دي

نفسي الحروب تنتهي

نفسي الأسعار تقل ... أو على الأقل تستقر

نفسي أتجوز

نفسي أخلف بيبي

نفسي أخلص مدرسة

نفسي أتخرج بتقدير كويس

نفسي أسافر اتفسح

نفسي أسافر أشتغل برة

نفسي ربنا يرزقني بشقة

نفسي يكون عندي عربية

نفسي أتعين في وظيفة محترمة

نفسي أجوز العيال

نفسي أسافر أعمل حج أو عمرة

نفسي ... نفسي ... نفسي ... الناس نفسها في حاجات كتير أوي .. يارب طبعاً تتحقق وربنا يستجيب للدعاء ده كله

بس فيه حاجة

اشمعنى الناس مستنية سنة تروح وسنة تيجي علشان يتمنوا أو يدعوا أو يغيروا من نفسهم او من حياتهم أو حتى ينتظروا من الآخرين التغيير ده ... ساعات لما بفكر في السنة الجديدة ... مابحسش بأي فرق .. مجرد كانت سبعة فوق .. وبقت سبعة تحت

ساعات أقل حافز أو أقل مناسبة ولو حتى ملهاش أساس أو أصل علشان نحتفل بيها بتكون علامة فارقة في تاريخ بني آدم من الأحسن إلى الأسوأ أو كما أتمنى السنة دي من الأحسن إلى الأسوأ

الأيام بتمر بسرعة .. بسرعة أوي ... والسنة حتمر بسرعة أوي ... محتاجين نعمل حاجات كتير قبل نهايتها

محتاجين نخطط للي بنحلم بيه .. وننفذ اللي بنخطط له .. علشان السنة دي ... الـ356 يوم كلهم ما يبقوش مجرد احتفال بانتهائهم أو بدايتهم

مش مجرد سبعة فوق .. وسبعة تحت

مطبخ مستكة يرحب بكم

!!!المطبخ ده شبه مطبخي أوي في الشكل والمساحة (لغاية ما أصور لكم مطبخي) اللي أكيد أحلى منه

كان بقالي فترة كبيرة أوي قربت على الخمسة أشهر بوعد الناس إني حقدم وصفات أكل من مطبخي .. أقصد من الأكلات اللي بطبخها في بيتي أو بجربها جديد وبيطلع طعمها حلو أوي ... مش محروق ولاشايط ولاناقص أوزائد ملح (علشان بس محدش يتريق)

على العموم الخدمة دي حقدمها بداية من شهر يناير ... يعني السنة الجاية 2008، وفضلت مأجلة الخطة دي لغاية ما أكون طبخت كام صنف كده على كام نوع حلو علشان مايحصلش عندي عجز في الوصفات وكمان علشان أكون جربت عمل الصنف الواحد كذا مرة واتقنته خلاص

بإذن الله كمان حضيف الكتير من النصايح اللي ممكن تفيد المتجوزين جديد، وأهم وأشهر الأخطاء اللي بنقع فيها في أول سنة مطبخ، زائد (وده اللي أرجو يعجبكم إن شاء الله) ديكورات لمطابخ زرتها.. مطابخ أصحابي أو أقاربي أو صور شفتها وعجبتني، كمان أحدث وأفضل المنتجات اللي بتساعدنا في المطبخ والأجهزة اللي زي الخلاطات والمطحنة وغيرهم وأسعارهم في السوق... ده غير أدوات المطبخ وأهم المحلات المختصة بكل الكلام ده... وأماكنها وأسعارها ... وده حيكون الجديد اللي أقدر أقدمه لكل البنات والستات وللمهتمين من الرجالة والأولاد على البلوج بتاعي لعام 2008 بإذن الله واللي على نهايته أتمنى إني أكون قدرت أعمل قاعدة بيانات كبيرة لكل احتياجات المطبخ بالتفصيل، ودي مش حييجي غير بمساعدتكم وتشجيعكم ليا وكمان تعليقاتكم، اقتراحتكم، وردودكم اللي بتمنى أشوفها قريب في مطبخي

أرجو إن القسم الجديد ده على مدونتي بإذن الله ينال إعجابكم ومستنية أفكار وإقتراحات كتيييرة ... سلام

!نقاوة ... فيلم آخر نقاوة

امبارح بالليل خير اللهم اجعله خير كنت قاعدة أنا وعلي بنتفرج على التلفزيون وبنقلب في القنوات يمكن نلاقي أي فيلم حلو نسهر عليه وشوية وقرينا إن فيلم أسرار البنات حيبدأ على قناة الأفلام

art1
ولصدمتنا الشديدة طلع فيلم تاني خالص لقينا موسيقى بلدي مبهمة وشاشة سودا مكتوب عليها (نقاوة) وبعدها بطولة حسن الأسمر، نهلة سلامة، الفنان القدير حسن كامي، والفنانة القديرة ميمي جمال، بالإشتراك مع جليلة محمود

ما بقناش قادرين نمسك نفسنا م الضحك، كنت لسة حقلب قناة تانية، لقيت علي بيقوللي استني شوية لما نشوف إيه ده، وأهو نضحك شوية

وبعدين قرينا في نفس التتر الموبيأ ده
سيناريو
نيسرين عبد الحميد عباس ونرمين عبد الحميد عباس ووراهم مباشرة المنتج المنفذ أختهم التالتة نيفين عبد الحميد عباس وبعدين وفي الآخر خالص قبل اسم المخرج المجهول انتاج الدكتور عبد الحميد عباس

مكناش فاهمين دكتور في إيه بالضبط

المهم إن العيلة أخدت الفيلم مقاولة وقالوا يبقى زيتنا في دقيقنا ويا بخت من نفع واستنفع

والله افتكرت فوراً المونولوج الشهير بتاع ثلاثي أضواء المسرح لما كان الضيف احمد الله يرحمه بيعلن عن فيلم ( عودة الندل) وبيقول

عودة الندل أقوى أفلام الموسم، الفيلم الكوميدي التراجيدي الراقص الذي أبكى وأضحك الكثيرين

فيلم عودة الندل بطولة عبد الحميد الترزي

انتاج أبو عبد الحميد الترزي

مونتاج ابن عبد الحميد الترزي

باتيناج بنت أخت عبد الحميد الترزي

مكساج بنت خالة عبد الحميد الترزي

المهم إن اسم الفيلم نفسه يصيبك بالدهشة وأول مشهد طلعت فيه نهلة سلامة مع جليلة محمود اللي هي امها قالوا فيه قصة الفيلم كله تقريباً واللي بتدور حوالين المعلم بيومي (حسن أبو وحمة في دماغه ... أقصد الأسمر) اللي اتجوز جليلة محمود علشان يستغل معاش جوزها المرحوم وفي نفس الوقت منغص على نهلة سلامة اللي تبقى بسم الله ماشاء الله بنت مراته عيشتها

وطبعاً الأخت تبقى نقاوة اللي بتكافح علشان امها وجوز امها والحارة كلها

بنت مجدعة وزي الفل وزي القمر والناس كلها حتموت عليها ... طبعاً يا جماعة دي نهلة سلامة ... حاجة آخر شياكة ورقة الصراحة

طبعاً ماقدرناش نكمل الفيلم من كتر حلاوته ومؤثراته الصوتية والبصرية وخصوصاً إن الحاج حسن الأسمر غنى آخر أغانيه الشهيرة .. إدلع يا حلو ... حلو حلو حلو .. يا أبو رمش مكحلو .. حلو حلو حلو

!قلبنا الجزيرة في النهاية وقلنا خلينا في الآخبار أحسن .. حاجة كده آخر نقاوة

صمت الخرفان

كل عام وأنتم بخير
يارب الجميع يكونوا بخير وصحة بعد انتهاء أجازة العيد وأكل كميات هائلة من الفتة واللحمة لغاية ما بقينا كلنا نبظ بتلو على كندوز على ضاني ... وبالذات الضاني ده اللي بكرهه كره العمى

اليوم الأول من أيام عيد الأضحى هو أكتر يوم مميز طبعاً علشان الذبائح اللي ريحتها تزكم الأنوف والدم اللي مغرق كل مكان إلا قليلاً
كان يوم عائلي مائة بالمائة ويوم برضه مليان لحمة ومليان دم والدم طبعاً منتشر في جميع الأرجاء مش فارق مكان راقي من مكان شعبي، في الشارع، فوق السطح أو جوة المنور أو عند الجزار، الدم في كل حتة

ليلة العيد يوم وقفة عرفة اكتشفت إن فيه خروف في منور عمارتنا، كان ساكت طول النهار يا حبة عيني لغاية الساعة 2 صباحاً وفجأة هاتك يا مأمأة ... لأ ومش أي صوت ... صوته عالي ويخض جداً كأننا في فيلم رعب لدرجة إني حسيت إنه راجل صوته خشن ومحشرج وبيستهبل وعامل فيها خروف

المهم طول الليل ولغاية الفجر والواحد سامع صوت الأخ اللي حيدبح بعد ساعات ده وزمايله الخرفان والعجول في المنطقة اللي حوالينا من بين السرايات لغاية جامعة القاهرة

المهم على الظهر كده لما صحينا من النوم كان صمت تام ... مفيش خرفان .. فقط أصوات بمب العيد والعيال المنتشرة في الشوارع، لكن الريحة كانت (استغفر الله العظيم) بشعة.. ريحة الناس اللي بتطبخ ضاني من الصبح على ريحة فرو الخرفان اللي الفقراء ماشيين بيه في الشوارع... لأ وكمان ده علي بيحكيلي إن بعد ما الجيران دخلوا خرفان تانية المنور علشان يدبحوها في فقراء كتير اتلموا مستنيين ساعة التوزيع واتخانقوا مع بعض خناقة لرب السما
وواحد منهم كان بيقول .. انتوا مش عايزين تدخلوني ليه أنا ابني عيان وفي المستشفى
الحقيقة أنا مافهمتش إيه علاقة اللحمة بالمستشفى بس مش مشكلة .. هو أدرى برضه

طبعاً أنا أول مرة أسمع إن الفقراء بيتخانقوا مع بعض في اليوم ده بسبب اللحمة (هو الصراحة عندهم حق بعد ما وصل كيلو البتلو حالياً اللي محدش يعرفوا كتير لستين جنيه) بس عندهم حق الناس بقت تتخانق على الأكل لأنها مش لاقية أكيد مش علشان الرفاهية

ده الواحد لما بيكون فاطر وفات ميعاد الغداء بتاعه بيبقى مستعد يعمل أي حاجة علشان جعان، فما بالك بالجعان بالأيام والأسابيع
وبعدين في ناس بتدوق اللحمة دي من السنة للسنة وفي ناس ماتعرفش طعمها أصلاً وعندها عيال جعانة لازم تفرحها وتشبعها

إذا كنا بناكل لحمة كتير فلازم نفكر في غيرنا ونحاول على قد ما نقدر نطلع كيلو لحمة ولو كل كام شهر علشان ربنا يبارك لنا في اكلنا وفي صحتنا

المهم المنور عندنا كان مغسول بعد كل الذبائح دي طول النهار، لكن ريحة الخرفان فضلت لازقة بغراء فيه وماراحتش غير تاني يوم بالليل

على ثالث يوم العيد كده سمعت لكم صوت خروف بيمأمأ .. سبحان الله ... وده نسيوا يدبحوه ده ولا إيه ولا هرب وبيدوروا عليه؟
بس بجد ده خروف فضحي أوي ... مش يقعد ساكت أحسن ما يلاقوه ويدبحوه
!ولا تلاقيه بيمأمأ بقلب جامد أوي اكمن الناس شبعت لحمة

!جدي الحبيب ... لقد مضى الزمن الجميل

لم أكتب منذ فترة كبيرة جداً حتى شعرت أنني لم أعد قادرة على الإبداع أو حتى أن أضغط على ثلاثة حروف لأكون كلمة مفيدة واحدة

ولكن وكالعادة أعود مرة أخرى وأكرر أنني لن انقطع وسأظل اكتب يومياً حتى أشعر بذاتي وموهبتي على مدونتي الخاصة

ولكن هذه المرة سوف اترك كل شيء للظروف، ولكني أعد بعدم غلق هذه المدونة ما حييت بإذن الله وأرجو ان يوفقني الله في كتابة كل ما أريد تسجيله هنا والإستفادة منه بعد ذلك، سواء في استرجاع بعض الذكريات الشخصية أو المعلومات والأخبار الهامة التي أنقلها

اليوم وبعد أن مر ما يقارب الأسبوعين على وفاة جدي مراد، أشعر انني أريد أن اكتب عنه الكثير... عن حياته أكثر من وفاته... وعن إحساسي به أكثر من إحساسه بنا وبمن حوله

جدي والد أمي هو السيد مراد عبد الحكم الضرغامي (والسيد هنا اسم مركب وليس لقباً) من مواليد العشرينيات حيث ولد أوائل القرن الماضي عام 1921 في منشية سلطان بمحافظة المنوفية، وبمناسبة المنوفية لقد كان يسمعنا نتناقل نكات المنايفة المعروفة طبعاً وكان يرد علينا دائماً بأن المنوفية محافظة أصيلة وعريقة وكلها ولاد ناس وعائلات... ده حتى الريس والحكومة كلها منايفة... فكنا نضحك أكثر

أما عن اسم العائلة وهو الضرغامي، فبحسب ما قاله جدي لنا وما هو مثبت في الأزهر أن هذا الإسم يرجع إلى رجل يدعى أحمد جاء من الشام إلى مصر أيام المماليك وأبلى بلاءاً حسناً في عدد من الحروب فأطلق عليه ضرغام وهي تعني الأسد وذلك لشجاعته... ومن هنا أتى اسم العائلة الذي كتب أيضاً أنه يرجع إلى نسل الحسين حفيد النبي صلى الله عليه وسلم

عندما أتذكر لوهلة أن جدي ولد في العشرينيات وعاش حتى عام 2007 اشعر باستغراب شديد، واحاول ان أضع نفسي مكانه ولكن بالطبع لا اعرف... كيف عاش جدي في ما نطلق عليه الزمن الجميل حيث الخير وفير والأكل نظيف والناس طيبين، ثم رأى ما وصلت به البلد إلى غلاء ونصب وضيق ذات اليد

كيف شعر في ظل وجود الملكية، ثم بمرور ثلاث رؤساء للجمهورية

لم أكن مقربة منه كثيراً، ولكنني أحببت حكاياته عن وسط البلد حيث عاش في ميدان التحرير أكثر من نصف قرن، فكان يحكي لنا عندما كان اسمه ميدان الإسماعيلية، وكانت هناك معسكرات للإنجليز في نفس المنطقة التي تقع الآن أمام المتحف المصري

كان يحكي عن كافيه ريش وجروبي والمشاهير الذي كان يراهم يجلسون هناك، كان يتحدث عن أسعار الإيجار والأكل والمواصلات زمان

كان يحكي لنا عن العدد الكبير لجنازات المشاهير التي كان يشاهدها من سطح العمارة، مثل جنازة عبد الناصر وعبد الحليم وأم كلثوم، وغيرهم الكثيرين

نحن لم نعش وقتها ولكننا عندما نسمع عن فرق الأسعار وأسلوب المعيشة ونضحك على الجنيه الجبس... نشعر بحسرة على تلك الأيام الكثر إشراقاً، فما بالك بالذي عاش الزمنين

أتذكر جيداً بعد أن تمت خطبتي ان قال لي علي زوجي... جدك بجد عنده كم حكايات وهمي عن وسط البلد والناس زمان وأيام الملك... إحنا لازم نستغله ونعمل معاه فيلم وثائقي عن وسط البلد

نسيت طلب علي تماماً وبات هذا الفيلم بالنسبة لي حلم بعيد المنال... مجرد حلم... حتى أنني في الكثير من الأحيان كنت اتخيل السيناريو والموسيقى والحكايات التي سيسردها جدي على المشاهدين

الآن أصبح هذا الحلم مستحيلاً... ولكنه سيظل في خيالي إلى الأبد

جدي الحبيب... لقد توفاك الله، فانتهى عمرك ومضى زمنك، كما حدث لمن ذهبوا قبلك وسيحدث لنا ولمن يأتي من بعدك

أدعو الله أن ييسر حسابك ويدخلك فسيح جناته ويلحقنا بك ومع الصالحين بإذن الله

!!!في الفرح مش مدعي

اتعودت آخذ صدمات ومفاجآت كتير من ناس كنت فاكراهم دايماً قريبين مني، أو هما فعلاً أشخاص قريبين أوي مني ولقلبي، لكن مش أنا اللي قريبة منهم

احساس مؤلم أوي بجد
اللي بيعمل ده ما بيحسش، لكن اللي بيحصل معاه الموقف ده بيحس بمرارة شديدة

المهم إن الكلام ده اتكرر معايا خلال السنة دي أكتر من 10 مرات، كل مرة باخد صدمة كبيرة أوي، ولكهم للأسف أشخاص من أقرب المقربين ليا... ساعات الشخص صاحب المناسبة بيفتكر إن المفاجأة اللي بحس بيها بتكون من الإنبساط بس ... لكن المفاجأة بتكون من صدمتي بعدم معرفة الخبر ده غير متأخر أوووي أو ساعات مبعرفوش أساساً والألطف من كده ساعات اللي بفتكرهم قريبين دول بيحاولوا يخبوه عني بالذات دوناً عن أي شخص تاني واتصدم أكتر لما أعرف إن في ناس كتير عارفة مش على مدى درجة القرابة أو الصلة بالشخص صاحب المفاجأة الحلوة والصادمة في نفس الوقت

في الوقت الماضي ومؤخراً ابتديت أحس اني منبوذة من ناس كتير، وخارج دائرة اهتماماتهم وخروجاتهم، أو بمعنى أصح مش صديقة قريبة لناس كتير أوي كنت فاكراهم قريبين... احساس بالزهق يمكن مني واحساس بعدم وجودي أصلاً

ساعات بقول إن الموضوع مش فارق معايا وإن وجود الناس حواليا مش هو اللي حيخيليني مبسوطة، ساعات وجودهم ووجود خروجات كتيرة وواجبات ناحيتهم بتخنق الواحد برضه
لكن إحساسي الحالي هو الفراغ... بالرغم من جوازي، إلا إني دايماً ما بعتقدش إن الجواز كل حاجة، يعني اللي متجوز من غير صحاب خالص ده عامل زي اللي مقطوع من شجرة

الغريب إن ساعات إحساسي بالضيق والوحدة بعد المفاجآت الصادمة دي من أشخاص قريبين ساعات بيتقلب لرغبة في إهمالهم مع إني مبعرفش خالص.
والأغرب إني لما بسأل ناس تانية أعرف إنهم قريبين من الشخص ده وعارفين عنه حاجات يمكن تفرحني عنه بيفتكروا إنه فضولية أوي وبحب أحشر مناخيري في كل حاجة

فعلاً أنا كنت بصدق إني فضولية، لغاية ما تأكدت إن اللي بشعر به ده ليس إلا غيرة
غيرة شديدة على اللي بحبه، غيرة من اللي بيعرف عنه أكثر ويكون مقرباً منه أكثر

اكتشفت أني بغير على أصدقائي وأحبائي يمكن ساعات أكتر من غيرتي على زوجي
المهم إن ده نابع من حبي ليهم وهو مش حاجة مرضية ولا حاجة، لو حد حيخاف مني بعد كده وحيعاملني بحساسية شديدة مفيش داعي لأني باخد بالي موووت من الحاجات دي

على العموم اتمنى إن يكون ليا أصدقاء حقيقيين بيتعبروني برضه صديقتهم الحقيقية اللي في حزنهم مدعية وفي فرحهم برضه مدعية مش الأماكن محدودة والعدد على القد والكلام الفارغ ده

ماذا فعلت في أيام الرحمة؟

بقالي زمن كبير نفسي أكتب من أول رمضان بس للأسف مفيش أي وقت ولا كومبيوتر ولا نت وبقيت في حالة تقشف أوي، الأسبوع ده حيكون زحمة ومزنوق أوي في الشغل والأسابيع اللي فاتت برضه من أول رمضان ولغاية النهاردة

كان نفسي أكتب كل يوم تدوينة من أول يوم في رمضان، زي مذكرات يومية كده عن إزاي رمضان عدى عليا السنة ودي أول سنة وأنا متجوزة وفي بيتنا أنا وعلي، وأول سنة مافطرش مع أهلي على سفرة واحدة أول يوم، وبرضه أول سنة أدخل المطبخ وأعمل فطار وأبقى مسئولة عن إطعام زوجي وإفطاره وسحوره

فبالمختصر المفيد كده حكتب نقاط ونبذات سريعة عن العشرة أيام اللي فاتوا دول على أمل إني أحاول أول لما أعثر لي على جهاز ونت أكتب باستفاضة وتفصيل وبشكل يومي إن شاء الله

اليوم الأول الخميس ... نزلت الشغل للأسف وقعدتللي بتاع ساعة كده قبل ما نتطلع أنا وعلي نفطر عند حماي وحماتي، طبعاً كنت مفتقدة أهلي وأخواتي جداااااااااااً وخصوصاً إن إحنا لينا كده شوية طقوس قبل الفطار مختلفة عن أي حد تاني، طبعاً أكل طنط كالعادة الوهمي خللى البنج يضرب في جسمي كله بعد ما صليت المغرب، فنمت زي القتيلة لغاية الساعة تسعة ونص بالليل مش حاسة أنا فين، وبعدها هاتك يا مسلسلات لغاية ما قمنا نروح

اليوم التاني والتالت الجمعة والسبت... عملنا مغامرة رائعة من موقف أحمد حلمي بشبرا وحتى موقف العاشر على طريق الإسماعيلية ولغاية بيت بابا وماما في العبور علشان نفطر معاهم تاني يوم، بيتنا معاهم وقعدنا لفطار تالت يوم والحقيقة كانوا يومين تحفة

اليوم الرابع الأحد... نزلت الشغل ورجعت جري الساعة 5 لأني ولأول مرة في تاريخي أطبخ وكانت أكلة رائعة بصراحة بس أكلنا بعد الأذان بنص ساعة ... عادي يعني أول مرة وكمان بشتغل

اليوم الخامس الإثنين ... رحت أفطر عند آنا جدتي في التحرير مع اهلي علشان نشوف ماتش الأهلي والزمالك سوا وعلي كان عند طنط واونكل طبقاً لمعاهدة السلام والإتفاقية رقم 6130 لكيفية مشاهدة المباريات واللي بتنص إن لما يكون فيه ماتش أهلي وزمالك لازم نشوفه منفصلين، المهم أهلي رجعوني الساعة اتنين صباحاً البيت ... حاجة سبور خالص

اليوم السادس الثلاثاء ... نزلت الشغل ومحمد أخويا جه يفطر عندنا وبرضه المنيو الحمد لله كانت حلوة... الرجالة اعجبوا بالأكل، بعد كده علي نزل وراح لماما العيادة علشان يفك الخياطة بتاعة عملية ضرس العقل اللي كان عاملها وفضل تعبان بيها لغاية أول امبارح كده... الحمد لله هو دلوقتي بيتحسن

اليوم السابع الأربعاء ... كنت قاعدة في البيت بس قمت متاخر اوي وعملت الفطار برضه للمرة التالتة، كان مش بطال مش سيء أوي... علي كان عنده مشوار لفندق شيراتون علشان حفلة إسلام أون لاين بتاعة

second life

ولكن بعد ما لبس بدلته ونزل وأنا نزلت معاه علشان أعمل مشوار مهم كده، قرر إنه ييجي معايا أهم ... طبعاً مش لازم تعرفوا إيه هو المشوار؟

الليلة دي حسين بات عندنا هو ومحمد واتسحرنا سوا

اليوم الثامن الخميس... تاني مرة نفطر عند طنط وأونكل ووصلنا عندهم بعد الفطار بربع ساعة لأني اتاخرت في الشغل وبعدها طلعنا على مترو ماركت نجيب شوية حاجات قبل ما نروح

اليوم التاسع الجمعة... كلنا معزومين عند آنا جدتي على الفطار ولأنها تعبناة قررنا كلنا تبقى ديش بارتي علشان ما تتعبش، وأنا تبرعت وعملت بسبوسة باللوز والحقيقة ما دقتش منها لأنها كانت غرقانة سمنة، غير كده الأكل كله كان وهميييييييي إلى أقصى درجة، اليوم ده علي نزل راح خطوبة أحمد رفعت الفجائية وانا قعدت مع اهلي لغاية ما علي رجع وروحنا على العبور مع بابا وماما

اليوم العاشر السبت... فطرنا عند ماما برضه ونزلنا معاها ووصلتنا على مترو الأنفاق وروحنا بيتنا ... يوم عادي إلى أقصى درجة

هي دي كل الأيام اللي فاتت بدون تفاصيل ورغي كتير ... وآسفة على الإطالة

يبقى شيء أخير، عدت 10 أيام من شهر رمضان، وبصراحة عدوا هوا ... فكروا كده عملتوا فيهم إيه وصلتوا للجزء الكام في قراءة القرآن اتبرعتوا وطلعتوا صدقات ولا لأ؟

زرتم أهلكم ولا لأ؟

رحمتم الناس ولا لأ؟

أيام الرحمة انتهت وعدت ودخلنا في أيام المغفرة... كل اللي فاضلله حاجة لسة معملهاش يعملها وكل اللي كان حد مزعله يسامحه ويغفر له

ادعوا الله بالرحمة والمغفرة وادعوا لي معاكم

وسلام

!!!في رمضان السنة دي ... صلوا أرحامك المقطعة

رمضان خلاص على الأبواب ... الخميس الجاي إن شاء الله

كل واحد بيستعد بطريقته كالعادة ... وكل واحد ليه أجندة وأولويات بيحب يقوم بيها طول الشهر

طبعاً كل بني آدم بيختلف عن التاني

في واحد مايبقاش همه غير على بطنه فيقعد يفكر حيفطر الأسبوع الأول في رمضان فين وحيتسحر مع مين؟

ويقعد يعمل قائمة طويلة وعريضة بالحاجات اللي نفسه ياكلها ويديها لوالدته أو مراته

ده طبعاً غير فقرة الحلو اللي بيقعد ألف مرة يفكر فيها وساعات يجيب كمية مكسرات وقمر الدين يخزنها للسنة كلها

وفي واحد تاني يبتدي يرتب مع صحابه وعيلته حيصلي التراويح فين كل يوم ويتفقوا كل كام يوم يصلوا في مسجد مع قاريء مختلف وياخدوا ثواب كل مجموعة صلوا معاها

وممكن ناس تانية يبتدوا يرتبوا حيزوروا ملاجيء وجمعيات خيرية فين؟

وكمان يلموا تبرعات ويفطروا الصايمين في الشوارع أو يعملوا موائد كبيرة لإفطار الصايمين

وفي نوعية تحب تعرف كل قناة تلفزيونية حتعرض مسلسلات وبراكج إيه علشان يعرف يوزع وقته صح ويرفه عن نفسه ... أيوة الناس تعبانة طول السنة ... مش فاضل غير الشهر ده يرفهوا عن نفسهم فيه

!!!!!

في مجموعة برضه بتقعد تحضر في الأدعية اللي حيركزوا عليها طول الشهر في كل صلاة، لعل الله يتقبل دعاءهم ويجعل السنة تعدي على خير وتتحقق أمانيهم

السنة دي أنا بدعوا كل الناس اللي بترتب بقالها فترة كبيرة هي حتعمل إيه في رمضان إنها تحط البند الأساسي ده في خطتها ... صلة الرحم

واللي أقصده على فكرة مش صلة الرحم اللي الناس فاكراها

أروح أزور جدتي وجدي وتيتة ونينة وبابا وماما والأصدقاء وكل الناس اللي أعرفهم وبحبهم

أنا أقصد الأقارب اللي مقطعاهم، أو اللي هما مقاطعني ... أو اللي حتى معرفهمش بسمع عنهم لمجرد السمع بس

وعلشان كده ربنا سماها صلة الرحم ... لأن معناها الصلة بالأقارب اللي هما قاطعني أصلاً وهو ده الثواب بجد

مش لازم نكون بنحبهم أو حتى نعرفهم كويس ... ومش لازم برضه زيارة (مع إن ده أحسن) وطبق حلويات شرقية، كفاية مكالمة تليفون ... ولو مفيش رقم أرضي وانت معكش رصيد اشتري كارت مباشر منزلي بتلاتين جنيه أو حتى عشرين جنيه وكلم كل الناس اللي مقاطعينك ... هنيهم بقدوم رمضان وقول لهم يدعولك وإنك حتديعلهم

فكروا كويس ومخمخوا

أكيد حتلاقوا ابن عم أو عم أو خال أو حتى قريب مجهول مقاطعك وانت مش عارف السبب، مجرد إنك اتولدت لقيت عيلتك مقاطعاه رحت مقاطعه انت كمان ... أو لو حتى كان غلط فيك وفي عيلتك.. انت برضه سباق بالخير ... وخيركم من يبدأ بالسلام

أنا بطلب من كل اللي بيقرأ دلوقتي، إنه يدور وينفذ الكلام ده علشان ربنا يبارك له ويضمن بإذن الله بداية جميلة للشهر الكريم واستجابة لكل اللي حيدعي به ربه بإذن الله

صدقوني، أنا مجربة ... بجد عمركم ما حتخسروا أو تندموا

!!!أربعة وعشرون ساعة بدون زوجي

بعد ما علي اقتنع أخيراً إنه لازم يسافر السودان وبعد ما أقنعته إن ربنا هو اللي باعت له السفرية دي ومفيش أي حد يقدر يتدخل ويلغيها غير بأمره ... أخيراً سافر

ولأول مرة أقضي 24 ساعة كاملة لوحدي من غيره .. أقصد من غيره في البلد طبعاً
إحساس غريب لأول مرة أحسه من ساعة ما اتجوزنا

المهم فكرت إيه الحاجات اللي ممكن أعملها أو أحب أعملها وعلي مش موجود

لقيت إن مفيش حاجة بحب أعملها دلوقتي لوحدي ... ماعدا القراءة
بحب أشتري أي حاجة من السوبر ماركت معاه .. بحب آكل معاه ... أخرج معاه .. أشوف أفلام معاه

امبارح كنت حاسة إن الأكل عادي أوي ... والتلفزيون خنيق والأفلام مملة ... والدنيا متساوية ونضيفة بشكل مستفز ... مفيش فوطة مش محطوطة في مكانها ولا تي شيرت مرمي على السرير

محتاجة علي يرجع بسرعة علشان أحس إن حياتي رجعت لطبيعتها تاني

على العموم لو أي حد عنده اقتراحات إزاي أسلي نفسي بعيداً عن الشغل خلال الكام يوم دول يقوللي...
ولو فيه أي أخبار من علي حبقى أكيد أقول ... هو اتصل آخر مرة امبارح بس ولسة معرفش حاجة عنه النهاردة
وعايزة كمان اقتراحات عن إيه اللي ممكن يتجاب مثلاً من السودان
مستنية ردود كتير

إيه ده ... رسالة على موبايلي
نمرة غريبة ... يبقى علي
رسالة من علي ... هييييييييييييييييييييييييه
علي دلوقتي في دارفور ... ربنا يجيبه بالسلامة ويبعد عنا الانقلابات وعمليات الاختطاف
إلا دارفور الواحد يجيب منها إيه .... أقصد يديها إيه ... مساعدة أقصد طبعاً مش تريقة
يللا سلام

طقم السفرة التيركواز

طقم السفرة التيركواز بتاعي هو أكتر حاجة بحبها في البوفيه اللي حاطينه مباشرة ورا ترابيزة السفرة

وده لأني كسرت قاعدة الصيني السينيه اللي كل الناس ماشية عليها وبتدفع فيها مبالغ خرافية وبعدين تركنها ديكور في النيش ونادر لما بتعمل عزومات وتقدم للضيوف فيها غير في أول الجواز بس وبعد كده ما تشوفهاش تاني غير لما عيالهم ييجوا يتجوزوا فيحبوا يتفشخروا بالطقم الصيني قدام نسايبهم وأهل جوز بنتهم أومرات ابنهم

فكرت بصراحة بما إني مبحبش الأطباق المنقوشة اللي عليها مية الذهب أو الفضة وبييبدأ سعرها من 6000 لغاية أكتر من 30 و40 ألف طبعاً حسب جودة النوع والماركة ومكان التصنيع، وبما إني ما بحبش غير الحاجة عالية الجودة فمستحيل أشتري طقم بالسعر المتخلف عقلياً ده ... أخذت رأي زوجي في الموضوع ولقيته برضه بيكره فكرة الطقم الصيني ده المقرر الإجباري في طقم العروسة

بصراحة خالي هو اللي إداني الفكرة دي ... قاللي إن الأطقم الأركوبال الفرنساوي ماركة لومينارك

Luminarc

كل سنة بتنزل موديلات جديدة وهمية، ولو فكرت واشتريت الطقم كله مش حيعدي 3000 جنيه وفي نفس الوقت ألوانه حلوة أوي وحستعمله على طول وزي ما بحب ... فرنساوي وماركة

المهم إني اشتراته كله من السعودية وخالي وزوجته ربنا يكرمهم غلفوه بطريقة خاصة علشان يوصل سليم ... ووقف عليا بأقل من لو كنت اشتريته من مصر ... ووفرت حوالي 900 جنيه من الثمن الأصلي هنا

أنا بجد بحب طقمي جداً ودايماً بناكل فيه ... وياريت الكل ينسى بقى حكاية الطقم الصيني دي ويفكر في أفكار جديدة مفتكسة حتكون حلوة جوا البيت وفي نفس الوقت الزوجين مبسوطين بيها

وبعدين مش كفاية إن كل حاجة مكتوب عليها صنع في الصين ... ناقصين إحنا كمان صيني في البيت؟؟؟

!!خارج نطاق الخدمة ... الإلكترونية

أحب أقول لأي شخص متابع مدونتي الفترة اللي فاتت ... إني حتوقف عن الكتابة لمدة أسبوع واحد فقط ابتداءاً من النهاردة وده بتعليمات من الطبيب اللي كنت عنده النهاردة ونصحني بالراحة التامة بعيداً عن أي مصدر إشعاع

يعني لا كومبيوتر ولا موبايل ولا تلفزيون ولا يورانيوم حتى

المهم ده كله لحين ظهور نتائج الفحوصات والتحاليل اللي المفروض أعملها وأطمئن ... خير خير إن شاء الله

على العموم بالرغم من إن ورايا أشياء وشغل بالهبل ما يعلم به إلا ربنا، إلا إني سعيدة إن ربنا بعتلي الأجازة دي ... بالرغم من إنها مرضي، لكن معلش الشغل على رأي المثل ملحوق عليه ... مفيش أغلى من صحة البني الآدم

لما أرجع إن شاء الله حبقى أحكيلكم إزاي تأقلمت على الحياة من غير كل التكنولوجيا دي ... يمكن الفترة دي جت في وقتها علشان أعيد ترتيب أوراقي تاني .. وأشوف إزاي أقدر أنظم حياتي
دي حتى يمكن تكون كمان فرصة حلوة أبتدي أقرا في هاري بوتر اللي قرب ورقه يصفر عندي وأخلص كتاب جلال أمين (عصر الجماهير الغفيرة) اللي لسة ماعدتش نصه من قلة وقتي

أي حد بقى يقرا الكلام ده يدعيلي أرجع أكتب تاني ... وبأقصى سرعة

سلامز

!!!تشابه عمارات

من كام يوم كنت بتفرج أنا و(علي) على فيلم أبو علي واللي بعتبره بصراحة من أجمل الأفلام اللي كتبها بلال فضل على الإطلاق حتى يومنا هذا

المهم كنا قاعدين مركزين مع الفيلم وهاتك يا ضحك ... وبعدين توالت المشاهد لغاية ما كريم عبد العزيز ومنى زكي قرروا يروحوا القسم ويسلموا نفسهم ... ويدوب بعد ما منى زكي كانت بتكلم أمها وجوز أمها على التليفون دخل الضابط سعيد العراقي (خالد الصاوي) القسم

وقعد حاطط رجل على رجل وقال لضابط القسم ... عملت لهم محضر يا باشا؟

وبعدها راح قايل للمحضر اللي كان قاعد ... اكتب يابني


إنه في تمام الساعة ... يوم ... قام الضابط

اكتب اسم الباشا

قسم الدقي ... تم القبض على .. واكتب أساميهم ... في أحد الأوكار بالعمارة رقم 7 شارع حسين كمال بين السرايات

وهوووب ... وقف عندك ... طبعاً عمري ماكنت ركزت في العنوان ده قبل كده

اللي أخذ باله طبعاً قبلي كان علي ... لما شافه في العرض الأول الصبح

وفضل يقوللي خللي بالك في مشهد القسم ده حتسمعي حاجة غريبة جداً

الغريب بقى بجد واللي نفسي اسأل بلال فضل عليه لما كان بيكتب السيناريو ... جاب العنوان ده منين؟

اللطيف في الموضوع إن العمارة رقم 7 دي قدام عمارتنا على طول وبنعدي عليها كل يوم في الرايحة وفي الجاية ... عمارة عادية جداً بمدخل ضيق ونضيف ولا شكلها بيدل على أوكار ولا غرز حتى

على العموم أي حد قريب من الدقي ممكن يبقى يعدي يشوف العمارة ... هي طبعاً مش حتاخد سمعة عمارة يعقوبيان اللي اتعمل عليها فيلم بحاله، لكن دي برضه عمارة اتقالت في فيلم وموجودة في الحقيقة

يا ترى سكان رقم 7 شارع حسين كمال أخدوا بالهم من اللقطة دي ولا لأ ... وإن اسم عمارتهم جه في فيلم اتعرض والناس شافته آلاف المرات
على العموم ابقوا خللوا بالكم وانتوا بتتفرجوا على أي فيلم مش بعيد تلاقوا عمارتكم يا جاية في لقطة يا مذكورة على لسان ممثل .. الله أعلم

م الثانوية للكلية ووحياة قلبي وأفراحه

الثانوية العامة بالنسبة لي كانت مرحلة سيئة تعليمياً وعدت ببلاويها الحمد لله

ودلوقتي لما بشوف أي حد في ثانوية عامة أو لسة مخلصها بكون مشفقة عليه بزيادة

التعليم الجميل بتاعنا هنا بيفهمنا إن اللي ما يجيبش مجموع ده ومايدخلش كلية من كليات القمة (اللي بقت تقريباً كلها قمة) يبقى شخص فاشل ومنحل. يعني الطب والهندسة هما زمان كانوا القمة، دلوقتي ماشاء الله التجارة والعلوم والآداب كمان بقوا قمة ... فيا حرام العيال اللي ملهومش في التعليم وممكن يبقوا عباقرة في نفس الوقت بيترموا في حتة معهد جربان ويتلموا على كام عيل مدمن على شمام على ضايع ويروحوا في الرجلين ولو كان معاهم فلوس بالعبط حينقضوا على الخاص اللي مفيش أكتر منه دلوقتي

عندك الجامعة الكندية ع الألمانية ع الكورية ع الهندية على جامعة موزمبيق حتى ... وساعتها العيل من دول بيفهم يعني إيه تعليم، بيكتشف التعليم من أول وجديد ويعرف إنه كان مدفون من زمان وبيطلع بعد كده الصراحة واحد تاني

المهم خلينا دلوقتي في حكاية الثانوية العامة دي


أول امبارح كانت النتيجة وطبعاً كالعادة علشان حسين أخويا في ثالثة السنة دي فقعدنا زي السنة اللي فاتت ملفوفين حوالين اللابتوب بتاع محمد مستنيين أي موقع يحن علينا بالنتيجة لغاية ما جت معانا على الساعة 12 ونص صباحاً وعرفنا إنه جاب 72% أدبي بالمستوى الرفيع وبعد كده سألنا على نتايج باقي قرايبنا اللي كانوا جايبين فوق التسعين كالعادة

عمر ابن خالي وإنجي بنت بنت خالة ماما


المهم إني محستش بصراحة إني متضايقة خالص من نتيجة حسين ... حسيت بصراحة إن إحنا عيلة ملهاش في التعليم أوي من أول الثانوية العامة بتاعتي ومروراً بمحمد وانتهاءاً الحمد لله بحسين

حسيت إن نجاحي أنا ومحمد في شغلنا وحياتنا العملية مكنش له أدنى علاقة لا بتعليم ولا ثانوية عامة ولا بتنجان .. أكيد الحاجة الواحدة اللي نفعتنا وجودنا في مدرسة لغات كويسة علت مستوانا أوي في الإنجليزي ككتابة وتحدث طبعاً الحمد لله ... وده مش ذم في المدارس العربي ولا حاجة بس فعلاً اللغة الأجنبية بتفرق من الصغر


أنا حاسة إني مبسوطة لحسين ولو راح أي كلية أو جامعة حاسة إني حبقى نفسي أشجعه يسعى للعمل في الحاجة اللي بيحبها من دلوقتي


أنا ومحمد اشتغلنا من وإحنا في الجامعة في الحاجة اللي طول عمرنا بنحبها من وإحنا صغيرين أنا في مجال الكتابة ومحمد في مجال تصميم المواقع والكومبيوتر

أفتكر كويس من وأنا طفلة إني مكنتش بعرف أعمل غير ثلاث حاجات كنت برسم وبكسب في كل مسابقات الرسم اللي شاركت فيها في المدرسة، كنت بكتب قصص قصيرة وأشعار بالإنجليزي وطبعاً مذكراتي كل أسبوع من وأنا في إبتدائي، والحاجة التالتة اللي محدش يعرفها عني الغناء (وده طبعاً لأن علي جوزي مابيحبش يتكلم عن الموضوع ده) بس من وأنا طفلة وأنا كنت في فرقة سليم سحاب الموسيقية في الأوبرا وكنت بغني في الحفلات أغاني ليلى مراد والفلكلور المصري القديم

المهم إن في النهاية مهنتي انتهت بحاجة بحبها وهي الكتابة ... يعني موهبتي انتهت بمهنتي


نفس الحكاية محمد من وهو في ابتدائي كان بيلم كل ربع جنيه معاه ويحطه في الحصالة ويلم في قروش كمان ولما كنا بنسأله انت بتحوش ليه يا محمد يقول أصل نفسي أجيب كومبيوتر

مكنش حد بصراحة بيضحك عليه ... تخيلوا لما طفل في السن ده بيلم بالربع جنيه علشان يحقق حلمه وكان ساعتها خالو طارق موجود في المجال ده وكان دايماً يروح له المكتب ويقعد يدعبس في السي بي يوز ويفتح في الأجهزة علشان يشوف جواها عامل إزاي

وفعلاً لما ماما لقت عنده الهوس ده مع إنه كان سيء جداً في التعليم قالت لازم تشجعه على حاجة تانية غير المذاكرة وفعلاً لما جبنا الكومبيوتر البيت في منتصف التسعينيات كان حياة محمد والحمد لله في النهاية انتهى بمهنة بيحبها ... خللى من هوايته شغل حياته

أما حسين فالصراحة مش عارفة هو بيحب إيه ... هوسه كله في الكورة ... وفعلاً بيلعب حلو أوي زي ما إحنا شايفين بس مفيش مدرسة كورة تاخده في السن ده ... كان قبل كده في مدرسة الخطيب بس للأسف الموضوع هنا في مصر ماشي وسايط ومحسوبيات... فاتعقد وحس إنه مكبوت ومش عارف يعمل حاجة

حسين ميعرفش أي هواية تانية ليه غير الكورة .. ملوش في القراية زي محمد بالضبط .. وملوش برضه في الكومبيوتر أوي

يا ترى حيطلع محلل رياضي مثلاً ... بصراحة الله أعلم

أما بالنسبة للثانوية العام اللي عدت السنة دي وأتمنى مسمعش عنها تاني غير أيام أولادي اللي ربنا يرحمهم برحمته الواسعة من تعليمنا اللي يجيب التخلف العقلي ده ... فأكتر حاجتين بيضايقوني يوم النتيجة ... أشكال الأوائل بتوع الثانوية العامة اللي تشل الواحد وهو شايفهم في كل برامج التلفزيون والجرايد والمجلات ومش بعيد كمان تحت السرير وتلاقي كل الشركات بتعرض عليهم خطوط وموبايلات ولبس ومش بعيد عربيات وشقق ومصيف في الساحل ... علشان إيه إن شاء الله ... دول عبارة عن شوية حفظة ودحيحة أشكالهم تسد النفس ... ومنعدمي الموهبة تقريباً ... الأوائل دول كانوا أكتر حاجة بتغيظني خصوصاً لما يطلعوا ويشكروا السيد الوزير والأستاذ الغفير بتاع المدرسة اللي خلاهم متفوقين من غير دروس خصوصية





الحاجة التانية الأغنيتين الأبديتين بتوع الست الحاجة ليلى نظمي ربنا يمسيها بالخير (م الثانوية للكلية) وطبعاً الأغنية الأشهر (وحياة قلبي وأفراحه) اللي تلاقي عبد الحليم بيتنطط فيها على المدرجات زي الفرقع لوز مع حسن يوسف ونادية لطفي

كنت أسمع الأغنيتين دول وأحس إني منهارة تماماً

وبعدين بقول ده حتى عبد الحليم بيقول الناجح يرفع إيده ... مش اللي جايب مجموع عالي يرفع إيده، فأنا حرفع إيدي غصب عن بوز اللي حيعترض

طب يعملوا إيه مثلاً بتوع المعاهد مفيش أغنية تقول م الثانوية ع المعهد ولا م الثانوية على بيت العدل ... حاجة كده من قبيل التغيير يعني، وعلشان العيال اللي مش متفوقة يلاقوا حاجة تواسيهم

مفيش مثلاً وحياة قلبي وأحزانه

بجد أنا بناشد التلفزيون وأجهزة الإعلام المبجلة بعمل أغاني للناس اللي ملهومش في التعليم بس في نفس ذات الوقت مش فشلة ولا حثالة

وياريت تكون بتغنيها نانسي عجرم علشان الغلابة دول يطروا على قلبهم شوية ... متبقاش النتيجة وكمان الأغنية عليهم

ملحوظة هامة : أرجو التصويت في الإستطلاع الجديد اللي أنا حطاه على يمين الصفحة واللي حغيره كل أسبوع إن شاء الله

مذكرات جيراننا اليمنيين الجزء الأول

علمت من والدتي بالصدفة البحتة مساء الثلاثاء الماضي خبر بقدر ما صدمني وأشعرني بالحزن الشديد، بقدر ما جعل مشاهد محددة من طفولتي وشبابي تمر أمام عيني

ماما : حقولك على خبر كده ... بس جدو مايعرفش

أنا : خير يا ماما؟

ماما : عمك محمد قائد اتوفى يوم الحد اللي فات في بيروت

أنا : إييييييييييه؟

ماما : كان في نعي النهاردة نص صفحة كاملة في الأهرام بس إحنا مجبناهوش ... وعلى فكرة جدك مايعرفش، هو أصلاً عيان والحاجات دي بتتعب نفسيته زيادة، إحنا نبهنا على كل الناس اللي عرفت وكمان فكري ومحمد بوابين العمارة إن محدش يجيبله سيرة ... ممكن يحصل له حاجة بعد الشر .. ولو سأل عليه حنقوله مسافر

أنا : طب هما الجماعة هنا ... في مصر؟

ماما : لأ كلهم سافروا من فترة ... واضح إنه كان عيان وراح بيروت يتعالج .. أكيد كان قاعد عند طنط فاتن (بنته) ماهو جوزها سفير اليمن في لبنان دلوقتي... على العموم إحنا عرفنا الخبر من طنط نعمت جارتنا

أنا : يااااااااااااااااااااه مش مصدقة ... الراجل ده كان صاحب جدو أوي ... كان راجل طيب أوي

تنتهي المحادثة بيني وبين والدتي وأغلق السماعة وأنا أشعر كيف أن الأيام تمر بسرعة رهيبة ... هذا الرجل الذي لم يعرفه الكثيرون في مصر، هو الرجل الثاني وقت قيام الثورة اليمنية التي فشلت في الخمس ... لم نعرفه هنا سياسياً أو وزير دفاع أسبق، ولكننا عرفناه جاراً متواضعاً وصديقاً مقرباً لجدي ... يخرجان سوياً ويتذكران أيام وسط البلد القديمة ... أيام جروبي وكافيه ريش ومعسكرات الإنجليز وسط ميدان الإسماعيلية (التحرير حالياً) مكان النيل هيلتون

بعدما عرفت هذا الخبر، ومرت بذاكرتي تلك الذكريات، وجدت الكثير ... بل أكثر مما كنت أتخيل، من الممكن أن أكتبه عن هذه العائلة اليمنية التي عاشت في مصر أكثر من 30 عاماً حتى الآن ... ومازال منزلهم يقع على يمين منزل جدتي في عمارة تنطق بفخامة وأصالة القرن الماضي ... تُرى، هل سيعودون للاستقرار بالقاهرة مرة أخرى بعد وفاة رجل المنزل الذي أحضرهم إليه أول مرة .. أم سيعودون إلى منزل العائلة في عدن؟

في هذا الجزء الأول استعرض سريعاً ما لم أكن أعرفه عن هذا الرجل وعرفته قريباً جداً من الصحف اليمنية وقناة الجزيرة وعدة مصادر أخرى، حتى أنني لم أتخيل أنهم يتحدثون عن نفس الرجل الذي كان يجلسني على رجليه ويدخلني منزله ويلعب معي ومع أخي

معظم التواريخ والأحداث التي سأرودها هنا موجودة بالفعل على بعض المواقع والمصادر

ولد محمد قايد سيف (وكنا ننطقها قائد، ولكن هكذا وجدتها مكتوبة) بقرية الحنجرة ناحية القبيطة باليمن عام 1933، وهو يصغر جدي باثني عشر عاماً
متزوج وله خمسة أبناء (ولدان و3 بنات)، "كلهم متزوجون ماعدا واحدة"

كان قايد سيف قد تعرض لنوبة قلبية، وتم نقله إلى مستشفى الجامعة الأمريكية ببيروت حيث توفي هناك صباح يوم الأحد الماضي

مما أعرفه تحديداً أن زوج ابنته الكبرى يعمل سفيراً لليمن في لبنان وهو مقيم حالياً مع زوجته وأبناءه هناك

أما عن تاريخ محمد قايد السياسي الذي لم أكن أعرفه من قبل، أنه قد انتقل رحمة الله عليه إلى عدن وعمره خمس سنوات ودرس في مدارسها حتى المرحلة الثانوية وهناك تعرف على الأستاذين والمناضلين الكبيرين أحمد محمد نعمان ومحمد محمود الزبيري واسهم ذلك في نمو وعيه الوطني وتنظيم نشاطه السياسي

كان أول عمل له مرتبط بحركة النضال الوطني توزيع صحيفة صوت اليمن التي كانت تصدر في عدن آنذاك
جاء إلى القاهرة والتحق بالكلية الحربية من عام 1950م إلى 1954م وكان أول طالب يمنى يتخرج من هذه الكلية.. بعد استكمال دراسته العسكرية في القاهرة عاد إلى مدينة تعز وأسس كلية الشرطة هناك

تولى مهام قيادة المحور الجنوبي وعمل ضابط اتصال بين البعثة العسكرية المصرية والإمام

وبعد فشل ثورة 1955م وإعدام الثلايا، فر إلى عدن وعين بعد قيام ثورة 26 سبتمبرعضواً في مجلس قيادة الثورة ووزيراً لشئون رئاسة الجمهورية ثم عين وزيراً للاقتصاد والإعلام ليكون بذلك ثاني وزير إعلام في حكومة الثورة خلال الفترة من 13 أكتوبر 1962 إلى 24 أبريل 1963 م بعد الشهيد/ علي محمد الأحمدي

كما عين عضواً في أول تشكيل لمجلس الرئاسة ورئيساً للجنة الشئون الخارجية في المجلس و في نهاية 1963م عين وزيراً للدفاع ونائباً للقائد العام للقوات المسلحة،ومن عام 1964م إلى عام 1968م عمل سفيراً لليمن في روما.. ومنح وسام 30 نوفمبر في عام 1989م

كل هذا التاريخ الحافل ... كنت أجهله تماماً حتى وقت قريب، لأنني كنت أتعامل مع هذا الرجل وأسرته كجيران مقربين فقط لا غير

وبالرغم من وجود الكثير من صوره هو وعائلته لدينا ... في أعياد ميلاد، مناسبات مختلفة، وصور من روما عندما كانوا هناك ... إلا أنني لم أجد إلا صورة واحدة على جميع محركات البحث بالإنترنت، وهي التي وضعتها هنا

في الجزء الثاني بإذن الله سأعمل على إحضار بعض الصور وعمل سكان لها

وسأروي المزيد من القصص الشخصية التي جمعت بين عائلتي وعائلة محمد قائد سيف

"بجد أغرب حاجة حسيت بيها إنك تكون قريب لشخص مهم وما تعرفش أسرار كتير عنه غير بعد ما يتوفاه الله

يا فرحة ما تمت .. خدها الأهلي وطار ... الحزن المكبوت الجزء الثاني

اتكبست أنا يا جماعة ... اتهزمت ... صحيح مكنتش هزيمة سهلة وكنا واقفين للأهلي زي اللقمة في الزور والكاللو في صباع الرجل ... بس برضه ما اتحصلناش ع الكاس

بعد ما كنت سعيدة أوي امبارح وكان عندي أمل فظيع إن الزمالك ياخد الكاس ... تحطمت أمالي وواضح إن ريحة الشياط في بيتي كانت واصلة لآخر الدقي

امبارح روحت البيت لوحدي بعد ما سابني علي وراح يتفرج مع طنط وأونكل .... المرة دي قلت مش حكبت مشاعري زي المرة اللي فاتت حتى لو اتحرمت من الملوخية اللي بتعملها طنط والقعدة واللمة معاهم

جبت معايا وأنا راجعة إزازة كوكاكولا وظبطت نفسي على الآخر ويدوب دخلت البيت وغيرت هدومي وفضلت قاعدة اتفرج على التعليق اللي قبل الماتش على الفضائية المصرية وشوية وابتدى الماتش ومن سوء حظي إن شوبير هو اللي كان بيعلق ... حاجة تقرف بصراحة ... أكتر أهلاوي بكرهه في حياتي ومديها عنتظة فارغة طول المباراة ...

أنا فخور إني بعلقلكم على لقاء القمة ... كأنه بيتعطف على أهلنا مثلاً

معرفتش للأسف أتفرج على دريم لأن الصوت كان مكتوم أوي وكان فيه تعليقين داخلين على بعض بشكل غبي ... ففي الآخر قلت شوبير وأمري لله

الماتش فضل واقف لغاية الدقيقة 30 بعد كده كان حامي موووووووووت ... الواد عمرو زكي ربنا يحميه كان مستموت على الكورة بجد

المهم انتهى الشوط التاني ... ونمت زي القتيلة على الأرض بين الشوطين ... الجميل إني صحيت على جول عمرو زكي ... حسيت إني بحلم .. قمت وقعدت أتنطط في البيت لوحدي زي المجانين ورحت واقعة ع الأرض من الدوخة ... بعد كده توالت الأحداث

جول عماد متعب : كنت شبه بعيط وقلت معلش أهو تعادل ... شدوا حيلكم يارجالة هاجموا .. بلاش نوصل لضربات جزاء

جول شيكابالا : جوووووووووووووووووووووووووووووووووووووووووووووووووووووووووووووووووووووووووول ... كنت بصرخ من الفرحة هو ده الزمالك ... ربنا يحميك يا شيكا ... يا سلام يابني على دي تسديدة وكمان وانت بتجري ... وطبعاً هاتك يا تنطيط وتصفير ورحت فوراً مكلمة محمد وقعدت أرن لبابا .. فرحة لا توصف بجد ... خلاص الكاس بتاعنا

جول أبو تريكة : حسبي الله ونعم الوكيل ده جول يدخل برضه ... والله لو كان وسام العابدي لسة موجود كان زمانه كلبش في أبو تريكة مخلاهوش عارف يتنفس مش يمسك كورة ... يخرب بيت ده دفاع ... حد يسيب السكة سالكة كده لأبو تريكة ... يادي الهم تعادل تاني ... بلاش ضربات جزاء يا جماااااااعة ... أرجوكم بلاااااااااااااااااااااااااااااااااش

جول جمال حمزة : جووووووووووووووووووووووووووووووووووووووووووووووووووووووووووووووووووووول يخرب عقلك يا جيمي ... إيه يابني ده .. ومين اللي عامله الباسة دي ... الغزال الأسمر شيكابالا ... إيه الهبل اللي بيحصل ده يا جماعة ... الماتش ده سخن أوي والملعب خلاص مولع ... ماتش وهمي ... وهمييييييييييييييييييييييييييييييييييييييييييييييييييييييييييي

جول (القاريء الشيخ) أسامة حسني : يا ليلة أسود في أحمر .... لأاااااااااااااااااااااااااااااااااااااااااااااااااااااااااا ... الحاج ده كان لسة مضيع جول ما يضيعش من عيل في حضانة ... اللي صلح حاله كده ... يكونش قرا آيتين جنب المرمى ولا حاجة ... الماتش حيخلص خلاص

ويصفر الحكم

يادي الخيبة ... أنا بكره الأشواط الإضافية ... دي اللي بيحصل فيها الكوارث كلها

بدأ الشوط الثالث وفي قفاه الرابع

العيال بتوع الزمالك بدءوا يشحروا خلاص ... البنزين بتاعهم خلص وبيلعبوا ببقايا البترول اللي في التانك

عمرو زكي رجله شدت وجيمي بتكعبل في نفسه وبيقع والعصفورة طارق السيد مابقاش محصل فرخة مصابة بأنفلونزا الطيور

بس برضه رجالة ... لعبوا باستموات وروح قتالية عالية أووووووووووووووووووووووووووووي ... بجد هو ده الزمالك ... هو ده الفريق اللي بحبه

وفجأة تحدث الكارثة ... وتسقط علي الصدمة مثل الصاعقة من السماء

الجول الرابع للأهلي .... كااااااااااااااااااااااااااااااااااااااااااااارثة ... الشيخ القاريء أسامة حسني ربنا مبارك له في صحته وراح رازع تاني جول ليه في اللقاء (من أري عليه في صحيته وقع بعد شوية مجبش منطق) وكأن دلوقتي التريد مارك بتاعت أي مباراة إن لازم يقع لاعب و يغمى عليه ويجيبوله الإسعاف ويقعدوا 500 تحليل مبارايات قدام يكلمونا عن مأساة محمد عبد الوهاب وهل ممكن تتكرر؟

مش ملاحظين إن لاعيبة الأهلي محسودين على صحتهم ... عبد الوهاب الله يرحمه، محمد صديق، وامبارح الشيخ القاريء ... بس الحمد لله كان دايخ حبتين وقام رجع تاني زي القرد

حبك ياخويا تقع والزمالك في عرض الثانية علشان هدف تعادل واحد

المهم بعد الجول اللي جابه الشيخ القاريء قمت وفضلت واقفة متنحة وقلبي بيدق وحسيت إن روحي بتروح مني

علي حيشمت فيا

نرمين حتشمت فيا Nescafe

فاروق حيشمت فيا

هواري حيشمت فيا

محمود حامد حيشمت فيا

رانيا حتشمت فيا

رشا حتشمت فيا

شوبييييييييير حيشمت فيا

كل الأهلاوية المتعصبين اللي عارفين إني برضه زملكاوية حتى النخاع حيشمتوا فيا

يارب جول .... يارب جول ... عايزة أفرح الليلة ... عايزة ألبس أبيض في أبيض وأقعد أتنطط

عايزة آجي الشغل مرفوعة الرأس والأكتاف وكلي كده شموخ وعظمة ... عايزة أفررر.... ويصفر الحكم وتنتهي المباراة فجأة وأنا لسة مفقتش من الصدمة

وألاقيلكم زي ما قلت زوجي العزيز بيتصل على التليفون ... مقدرتش أرد على أي تليفون لغاية بعد ساعة من المبارة ... وراح سايبلي رسالة على الأنسر ماشين

Leave a message after the beep

تشرشل ساب الحرب العالمية وجه علشان يشجع الأهلي

سعد زغلول ساب الثورة علشان يروح ويشجع الأهلي

ألووووووو ألووووووووو ألوووووووووو

ردي يا مريم

ردي يا مريم

تيت تيت تيت تيت تيت

فضلت قاعدة منهارة شوية وبعدين وصلت لتصالح من نفسي كده

أولاً الزمالك لعب حلو مووووووووووووووت غصب عن اللي يقول عكس كده

ثانياً مكنش بكل كفأته ... التبديلات اللي عملها هنري ميشيل كانت إجبارية ... وغير كده بصراحة الزمالك محتاج شوية عيال حريفة كده زي شيكابالا

ثالثاً وده الأهم الجمهور مقدر تعب الزمالك ... وبعدين التلفزيون المصري والحكومة وتلت تربع الشعب حيفضلوا كده على نظامهم ده ... حيفضلوا حمر ... مش حيبيضوا أبداً وده أمر واقع .. ولازم نتقبل ده ... مش حيبيضوا أبدااااااااااااااااااااااااااااااااااً

طبعاً أول ما جيت الشغل النهاردة أول تلاتة استلموني كانوا فاروق وهواري ونرمين

Nescafe

وهاتك يا تعليقات وإفيهات عن الفوز العظيم بتاعهم ومنهم اللي قالته نيرمين
زي ما خلصنا علي الكتاكيت الصفر خلصنا علي الفراخ البيضاء احنا الديوك الحمرا

وفاروق كان بيتريق على الـــ

Nickname

بتاعي وكان بيقوللي ... عايزنها تبقى حمرا ... الأرض اللي في الصحرا

أنا بس أحب أبلغ الجميع إن الفوز ده مجرد حظ عوالم

ولقاءنا المرة الجاية إن شاء الله يوم 9 أغسطس في ماتش السوبر

وأما نشوف يا أهلاوية

شدوا حيلكم بقى في كوت ديفوار ... أما نشوف بقى حتعملوا مع أسيك بعد ما اتهديتوا امبارح

الثلاث أجوان بتوع الزمالك ... شاهد