Sunday, August 9, 2009

حساب المكواة... 79جنيه حضرتك

يوم الأربعاء قبل اللي فات جم الستات اللي بينضفوا لي الشقة كل فترة علشان ينضفوا وكانت من ضمن المهام الموكلة ليهم في المرة دي إنهم ينزلوا كل ستاير البيت علشان تتغسل وتتنشر لأن لونها كان غامق جداً ومليانة تراب وقذارة من الجو والتلوث اللي إحنا عايشين فيه طبعاً
ده غير إن صاحبة البيت اللي إحنا مأجرينه ربنا يسامحها عاملة شبابيك سيئة إلى أقصى درجة الخشب بتاعها مفرق في حتت كتير وعلشان كده التراب والهوا بيتسربوا من الحتت دي وده السبب اللي خلانا نركب ستاير مع إني بكرهها وخلانا كمان ندفع حوالي 1200 جنيه لتصليح خشب الشبابيك دي على حسابنا ومع ذلك وبعد ما النجار عمل كل اللي يقدر عليه.. فضلت الشبابيك برضه سيئة شكلاً واستخداماً

المهم.. مش ده موضوعنا خالص.. ده مجرد السبب اللي بيخليني أنزل الستاير وأغسلها على الأقل 3 أو 4 مرات في السنة
بعد ما خلص غسل الستاير ونشرها مرة ورا التانية.. ونشفوا كلهم.. قررت أوديهم كلهم مرة واحدة للمكوجي اختصاراً للوقت.. لأني كل مرة بقعد أكويهم في أسبوع كامل وكمان ضهري بيتعب جداً وحتى مع وجود التكييف بحس بحر خرافي والواحد مش ناقص ومش مستحمل عرق وقرف
ده غير إن المكواة بتاعتي ماركة
National
وتقيلة زي الداهية يعني كأني شايلة دامبلز بالضبط وطبعاً المكواة دي جاتلي هدية قبل جوازي وده اللي خلاني أكسل أجيب واحدة تانية جديدة وخفيفة تكون برا
ون ولا فيليبس

عامةً ماما كانت عندي يوم الأربعاء اللي فات الصبح ولمتهم كلهم في كيسين كبار مع شوية هدوم تانية ونزلت بيهم وحطيناهم في شنطة العربية ورحنا للمكوجي طلعتهمله وقلت له يجيبهم على الساعة 9 ونص أكون رجعت من الشغل

المهم ماما وصلتني الشغل ورجعت أنا البيت بالليل على الساعة 10 إلا ربع تقريباً لأني كنت بشتري طلبات للبيت
لسة طالعة من الأسانسير لقيت 3 عيال صغيرين كل واحد فيهم شايل أكياس بلاستيك كبيرة مقفولة وجواها الستاير
قلت لهم ثواني وفتحت الباب وبعدين ابتديت آخد منهم الحاجة وأدخلها على الكنبة وفي الآخر طلعت آخد ورقة الحساب.. بسأله كام.. قالي

79 جنيه حضرتك
تنحت والواد نفسه كان مكسوف أوي ومستغرب
قلت له انت قلت كام يا بابا؟؟؟
قاللي هو الحساب 79 جنيه بالضبط وساب لي الورقة اللي انتوا شايفينها قدامكم تحت دي



طبعاً إديت له الفلوس وبقشيش ليه وهو والإتنين اللي معاه على قد تعبهم في شيل الحاجة بصراحة
ودخلت قعدت مع نفسي شوية وحسيت بالهطل والسفه وقررت إني مش حدفع المبلغ ده تاني أبداً مرة واحدة كده لمكوجي
ده حتى مكنش فيه ولا حاجة
Dry Clean
لأن دي الحاجة الوحيدة اللي بتبقى غالية.. لكن أدفع في المكواة المبلغ ده... ده فعلاً جنان

المرة الجاية لما أغسل الستاير هكويها بنفسي قدام التلفزيون وأنا قاعدة وإن شا الله تاخد أسبوعين.. أنا ورايا إيه يعني

3 comments:

مُصْعَب إِبْرَاهِيم said...

معلش يا مريم ..
كان أحسن لك تشتري ستاير جديدة والفرق مش هيبقى كتير :)

Rasha A. Mabrouk said...

Begad very nice da7ktny awi... mariam begad keep on writing i like your style...

nesma hatem said...

هههههههه وجع البطن ولا كب الطبيخ
معلش بقى .... بس حلوة اوى