Wednesday, October 15, 2008

!!!انزل الشوارع واتفرج على الفقر


اللهم إنا نعوذ بك من الفقر

كنت دايماً بستغرب جداً من وجود الدعاء ده في أذكار الصباح والمساء، وإني دايماً بردده ليل ونهار
طبعاً ربنا ما يكتب على أي واحد الفقر ولا مد الإيد والحاجة... بس على كده معنى إن إحنا بنستعيذ بالله من الفقر إني شيء كريه زيه زي الشيطان ... يعني عدو للبني آدم

وزي ما الشيطان بيغوي وبيخللي الإنسان يضل ويكفر، الفقر كذلك

المفروض كنت أكتب شيء عن الفقر بمناسبة اليوم العالمي للتدوين، وفعلاً كتبت شوية خواطر على المدونة التانية بتاعتي (الإنجليزي) بس ماكنتش عارفة حكتب إيه هنا خالص
فقلت أفضفض عن اللي مليان جوايا وعن الفقر اللي الواحد شايفه كل يوم حواليه لما خلاص قرب يتخنق

المفروض إني ساكنة في الدقي بس على العكس بطل من الخلف على منطقة بين السرايات... والمفروض إنها منطقة شعبية أو أقدر أقول من شكل المباني فيها وحال الناس اللي عايشين فيها إنها عشوائية... ولغاية دلوثتي نفسي أعرف فين السرايات دي اللي هي موجودة بينها... الإسم مش على مسمى تماماً
المهم بعيداً عن كل ده... الواحد بقى يشوف الفقر في كل حتة في البلد... يعني الزمالك جنبها على طول بولاق... المقطم في فيلات وعمارات فظيعة وفي نفس الوقت فيه مناطق على نفس الجبل زي الدويقة ومنشية ناصر... في المعادي وجنبها البساتين... في مصر الجديدة وإمتدادها تلاقي مجاهل عين شمس والسلام والمؤسسة ومساكن إسكندرية... العشوائيات والفقر بقى متفشي في كل حتة في مصر... والناس فالحة تروح تبني هايد بارك القاعرة الجديدة ومدينتي والرحاب وكريستال بلازا وتقولك هي دي العيشة اللي مفروض تعيشها
طب لما ناس غلابة أو حتى متوسطين الحال بيوفروا الأكل والسكن بالعافية ويشوفوا الإعلانات دي بيحسوا بإيه

مشكلة الفقر في مصر أكبر من مجرد مقالات وشعارات ضد الفقر وأرقام بيطلعها الجهاز المركزي للتعبئة والإحصاء... عدد الفقراء في مصر بيزيد كل يوم عن اللي قبله والفجوة اللي بين الفقراء والأغنياء بتوسع بشكل كبير جداً لدرجة إن مفيش حد حاسس بالتاني

اللي يضايق بقى كمان إن لما تكتب كلمة
Egypt
على أي محرك بحث
search engine
صور أو موقع صور زي
corbis
أو
Flickr
تلاقي معظم الصور إن ماكنتش لأهرامات ومعابد فلأحياء وعشوائيات فقيرة للغاية ومقالب زبالة وعيال حافية وعريانة ويكتب تحت الصورة ... الحياة اليومية في مصر، على أساس إن مصر مافيهاش غير الصور العشوائية دي، طبعاً مصر فيها كتييييير أوي بس المشكلة إن لما الناس تشوف الصور دي زيها زي غيرها بتروح مصوراها على طول... وبعده إحنا نقول إن الأجانب بياخدوا الصور دي علشان يسوئوا صورة مصر والمصريين والحضارة وكل كلام كتب التاريخ ده

بس الحقيقي إن الفقر كبر أوي و زبالتنا كترت أوي لدرجة إن في ناس تانية عايشة عليها
لغاية إمتى حتفضل الفجوة بين الفقر المدقع والغنى الفاحش تتسع كده؟؟
لغاية إمتى حيفضل في ناس عايشة في ملكوت تاني ومش حاسة إن الفقر بيزيد في مصر بمعدلات مرتفعة جداً، وإن فيه أسر كتير كانوا من الطبقة المتوسطة وقريب أوي مش حيلاقوا ياكلوا؟؟؟
يارب الناس تفوق
ياااااااارب


3 comments:

Anonymous said...

مصر مبقاش فيها مكان للمصريين.. خلاص اشتراها جمال مبارك وأحمد عز وبقية الأربعين حرامي
وسام كمال

Anonymous said...

يا ست الهانم اللى ساكنه فى الدقى ارحمينا انا ساكن فى بين السرايات و لو مش ساكن فيها اتمنى ان اسكن فيها و بعدين تعالى هنا انتى بتقولى ساكنه فى الدقى و بتبصى على بين السرايات من الخلف تبقى ساكنه فى الطبجى صح يعنى لما بتوقفى تاكس بتقولى بين السرايات امثالك هما اللى مرجعنا ورا والله العظيم ارحمونا بقى سبنا مصر و مشينا كمان مش رحمنا ع النت اتمنى انك تردى عليا و تفهمينى doksha552005@yahoo

MariumaZ said...

أنا مش فاهمة سيادتك متضايق ليه؟
أنت تنكر إن فيه أماكن كتير جوه بين السرايات أشبه بالعشوائيات وإن الناس فعلاً تصرفاتها وأخلاقها وخناقتها اليومية والشتايم اللي الواحد بيسمعها على الصبح وفي المسا والأفراح اللي بتتعمل في الشوارع لغاية الساعة 3 صباحاً وصوتها ضارب في الحيطان... كل ده مش يموت الواحد م الخنقة... كل ده من فقر الناس وعاداتهم وثقافتهم المعتمدة على العشوائية والضوضاء

وبعدين هو أنا قلت إن الناس هي السبب... ما الحكومة برضه ليها دور كبير أوي في المصيبة اللي إحنا فيها... وبعدين أنا بتكلم عن إن الفقر زاد في مصر أوي وده بيتضح في المناطق دي... حضرتك تنكر إن شاء الله؟؟؟

وبعدين هو زي ما يكون على راسك بطحة بصراحة أنا ماعيبتش على الناس اللي ساكنة في بين السرايات ولا علشان أنا ساكنة في الدقي واتابعة لمنطقة الدقي وسنترال الدقي وحي الدقي حتمنظر على الناس وأتنطط عليهم أنا في الآخر مستوايا المادي معقول وبشرب برضه من الغلاء والهم اللي الناس بتشرب منه في البلد دي فما بال الفقير اللي بيحلم برغيف عيش نضيف؟

وبعدين انت متضايق أوي ليه إني ساكنة في الدقي وحضرتك ساكن في بين السرايات... معتقدش دي فيها حاجة تضايق يعني أنا مجبتش سيرة سعادتك بحاجة وحشة كفى الله الشر.... وأمثالي مرجعين مصر لورا ليه إن شاء الله... واضح إن سيادتك اللي سيبتها مخضرة أهي
ربنا يهدي بجد