الثانوية العامة بالنسبة لي كانت مرحلة سيئة تعليمياً وعدت ببلاويها الحمد لله
ودلوقتي لما بشوف أي حد في ثانوية عامة أو لسة مخلصها بكون مشفقة عليه بزيادة
التعليم الجميل بتاعنا هنا بيفهمنا إن اللي ما يجيبش مجموع ده ومايدخلش كلية من كليات القمة (اللي بقت تقريباً كلها قمة) يبقى شخص فاشل ومنحل. يعني الطب والهندسة هما زمان كانوا القمة، دلوقتي ماشاء الله التجارة والعلوم والآداب كمان بقوا قمة ... فيا حرام العيال اللي ملهومش في التعليم وممكن يبقوا عباقرة في نفس الوقت بيترموا في حتة معهد جربان ويتلموا على كام عيل مدمن على شمام على ضايع ويروحوا في الرجلين ولو كان معاهم فلوس بالعبط حينقضوا على الخاص اللي مفيش أكتر منه دلوقتي
عندك الجامعة الكندية ع الألمانية ع الكورية ع الهندية على جامعة موزمبيق حتى ... وساعتها العيل من دول بيفهم يعني إيه تعليم، بيكتشف التعليم من أول وجديد ويعرف إنه كان مدفون من زمان وبيطلع بعد كده الصراحة واحد تاني
المهم خلينا دلوقتي في حكاية الثانوية العامة دي
أول امبارح كانت النتيجة وطبعاً كالعادة علشان حسين أخويا في ثالثة السنة دي فقعدنا زي السنة اللي فاتت ملفوفين حوالين اللابتوب بتاع محمد مستنيين أي موقع يحن علينا بالنتيجة لغاية ما جت معانا على الساعة 12 ونص صباحاً وعرفنا إنه جاب 72% أدبي بالمستوى الرفيع وبعد كده سألنا على نتايج باقي قرايبنا اللي كانوا جايبين فوق التسعين كالعادة
عمر ابن خالي وإنجي بنت بنت خالة ماما
المهم إني محستش بصراحة إني متضايقة خالص من نتيجة حسين ... حسيت بصراحة إن إحنا عيلة ملهاش في التعليم أوي من أول الثانوية العامة بتاعتي ومروراً بمحمد وانتهاءاً الحمد لله بحسين
حسيت إن نجاحي أنا ومحمد في شغلنا وحياتنا العملية مكنش له أدنى علاقة لا بتعليم ولا ثانوية عامة ولا بتنجان .. أكيد الحاجة الواحدة اللي نفعتنا وجودنا في مدرسة لغات كويسة علت مستوانا أوي في الإنجليزي ككتابة وتحدث طبعاً الحمد لله ... وده مش ذم في المدارس العربي ولا حاجة بس فعلاً اللغة الأجنبية بتفرق من الصغر
أنا حاسة إني مبسوطة لحسين ولو راح أي كلية أو جامعة حاسة إني حبقى نفسي أشجعه يسعى للعمل في الحاجة اللي بيحبها من دلوقتي
أنا ومحمد اشتغلنا من وإحنا في الجامعة في الحاجة اللي طول عمرنا بنحبها من وإحنا صغيرين أنا في مجال الكتابة ومحمد في مجال تصميم المواقع والكومبيوتر
أفتكر كويس من وأنا طفلة إني مكنتش بعرف أعمل غير ثلاث حاجات كنت برسم وبكسب في كل مسابقات الرسم اللي شاركت فيها في المدرسة، كنت بكتب قصص قصيرة وأشعار بالإنجليزي وطبعاً مذكراتي كل أسبوع من وأنا في إبتدائي، والحاجة التالتة اللي محدش يعرفها عني الغناء (وده طبعاً لأن علي جوزي مابيحبش يتكلم عن الموضوع ده) بس من وأنا طفلة وأنا كنت في فرقة سليم سحاب الموسيقية في الأوبرا وكنت بغني في الحفلات أغاني ليلى مراد والفلكلور المصري القديم
المهم إن في النهاية مهنتي انتهت بحاجة بحبها وهي الكتابة ... يعني موهبتي انتهت بمهنتي
نفس الحكاية محمد من وهو في ابتدائي كان بيلم كل ربع جنيه معاه ويحطه في الحصالة ويلم في قروش كمان ولما كنا بنسأله انت بتحوش ليه يا محمد يقول أصل نفسي أجيب كومبيوتر
مكنش حد بصراحة بيضحك عليه ... تخيلوا لما طفل في السن ده بيلم بالربع جنيه علشان يحقق حلمه وكان ساعتها خالو طارق موجود في المجال ده وكان دايماً يروح له المكتب ويقعد يدعبس في السي بي يوز ويفتح في الأجهزة علشان يشوف جواها عامل إزاي
وفعلاً لما ماما لقت عنده الهوس ده مع إنه كان سيء جداً في التعليم قالت لازم تشجعه على حاجة تانية غير المذاكرة وفعلاً لما جبنا الكومبيوتر البيت في منتصف التسعينيات كان حياة محمد والحمد لله في النهاية انتهى بمهنة بيحبها ... خللى من هوايته شغل حياته
أما حسين فالصراحة مش عارفة هو بيحب إيه ... هوسه كله في الكورة ... وفعلاً بيلعب حلو أوي زي ما إحنا شايفين بس مفيش مدرسة كورة تاخده في السن ده ... كان قبل كده في مدرسة الخطيب بس للأسف الموضوع هنا في مصر ماشي وسايط ومحسوبيات... فاتعقد وحس إنه مكبوت ومش عارف يعمل حاجة
حسين ميعرفش أي هواية تانية ليه غير الكورة .. ملوش في القراية زي محمد بالضبط .. وملوش برضه في الكومبيوتر أوي
يا ترى حيطلع محلل رياضي مثلاً ... بصراحة الله أعلم
أما بالنسبة للثانوية العام اللي عدت السنة دي وأتمنى مسمعش عنها تاني غير أيام أولادي اللي ربنا يرحمهم برحمته الواسعة من تعليمنا اللي يجيب التخلف العقلي ده ... فأكتر حاجتين بيضايقوني يوم النتيجة ... أشكال الأوائل بتوع الثانوية العامة اللي تشل الواحد وهو شايفهم في كل برامج التلفزيون والجرايد والمجلات ومش بعيد كمان تحت السرير وتلاقي كل الشركات بتعرض عليهم خطوط وموبايلات ولبس ومش بعيد عربيات وشقق ومصيف في الساحل ... علشان إيه إن شاء الله ... دول عبارة عن شوية حفظة ودحيحة أشكالهم تسد النفس ... ومنعدمي الموهبة تقريباً ... الأوائل دول كانوا أكتر حاجة بتغيظني خصوصاً لما يطلعوا ويشكروا السيد الوزير والأستاذ الغفير بتاع المدرسة اللي خلاهم متفوقين من غير دروس خصوصية
الحاجة التانية الأغنيتين الأبديتين بتوع الست الحاجة ليلى نظمي ربنا يمسيها بالخير (م الثانوية للكلية) وطبعاً الأغنية الأشهر (وحياة قلبي وأفراحه) اللي تلاقي عبد الحليم بيتنطط فيها على المدرجات زي الفرقع لوز مع حسن يوسف ونادية لطفي
كنت أسمع الأغنيتين دول وأحس إني منهارة تماماً
وبعدين بقول ده حتى عبد الحليم بيقول الناجح يرفع إيده ... مش اللي جايب مجموع عالي يرفع إيده، فأنا حرفع إيدي غصب عن بوز اللي حيعترض
طب يعملوا إيه مثلاً بتوع المعاهد مفيش أغنية تقول م الثانوية ع المعهد ولا م الثانوية على بيت العدل ... حاجة كده من قبيل التغيير يعني، وعلشان العيال اللي مش متفوقة يلاقوا حاجة تواسيهم
مفيش مثلاً وحياة قلبي وأحزانه
بجد أنا بناشد التلفزيون وأجهزة الإعلام المبجلة بعمل أغاني للناس اللي ملهومش في التعليم بس في نفس ذات الوقت مش فشلة ولا حثالة
وياريت تكون بتغنيها نانسي عجرم علشان الغلابة دول يطروا على قلبهم شوية ... متبقاش النتيجة وكمان الأغنية عليهم
ملحوظة هامة : أرجو التصويت في الإستطلاع الجديد اللي أنا حطاه على يمين الصفحة واللي حغيره كل أسبوع إن شاء الله
8 comments:
مضطر أخذلك يا أخت مريم
الثانوية العامة كانت أجمل فترات حياتي، ففيها قريت فلسفة بره كتاب الوزارة وحبيت علم النفس جداً والحمد لله الإنجليزي كان سبب في حبي أكتر للتعليم..
أنا ما كنتش دحاح على فكرة.. أنا كنت بحب اللي بعمله أوي.. ولذا كنت بحب المذاكرة
لكن خليني أتفق معاكي في رداءة التعليم المصري، ومستحيل حد يجيب 100% في أي دولة متحضرة، لكن مش كل واحد جاب المجموع الكبير ده لازم يكون إنسان معقد..
ممكن يكون الإنسان متفوق مثلاً لأن نفسه يكون حاجة كبيرة في المستقبل.. دكتور مثلاً أو صحفي أو سياسي أو مهندس.. أقصد إن الدافع القوي أوي.. والهدف المحدد منذ الصغر ساعات بيكون دافع قوي للمذاكرة الكتير (حتى لو ما كنش الإنسان بيحبها)..
هذا ما عندي.. والله أعلم
جيتي ع الجرح..
أتفق معاكي ومع علي على إن التعليم المصري مالوش في البطاطا
واسأل مجرب ولا تسألش خريج!
بصراحة يا مصعب بالنسبة لي واحد عبقري زيك لما يطلع من كلية الهندسة يبقى في حاجة غلط في تعليم البلد دي
وعلى فكرة بما إنك في تجارة دلوقتي وأنا كنت في تجارة قبل كده فأنا عارفة كويس كووويس جداً إن تلت تربع الموجودين بكلية الشمس والماء والهواء دي يا إما جايين من هندسة أو طب أو صيدلة ... يا إما مجموعهم ماجبش هندسة ولا طب ولا صيدلة زي حالاتي كده
والأمثلة أنا وانت وياسو الله يمسيها بالخير
برضه معلش يا مريم مضطرة أضم صوتي لصوت جوزك وأخذلك أنا كمان.. صحيح التعليم عندنا متخلف جدا، لكن هذا لا يعني أن كل متفوق حفيظ ومعندوش مخ.. وعلى فكرة بقى الثانوية العامة بالذات موادها فيها حاجات كتير جدا مفيدة وبتنمي العقل وتزود الثقافة.
وبعدين ليه القرف ده كله من أوائل الثانوية العامة، وليه حكمتي عليهم كلهم بإنهم حفيظة ويقرفوا.. أولا صعب قوي نقول على واحد متفوق في العلمي انه حفيظ، وحتى لو كان كذلك فالقدرة على الحفظ نفسها ملكة وموهبة عقلية تحسب لهم مش عليهم، ولا تعني على الإطلاق انهم مبيفهموش.
آخر حاجة بقى بضم فيها صوتي لصوت الأخ علي هي ان الثانوية العامة دي اختبار لقدرتك على تحقيق أحلامك حتى لو كنت مضطر تعمل حاجة مش بتحبها قوي.. وده في حد ذاته نجاح..
شكرا يا باشا على التدوينة.. ودايما متألق :)
أولاً رداً على الأخ علي زوجي العزيز
أساساً طنط وأونكل كانوا بيشتكوا منك إنك مكنتش بتحب تخرج أو تتفسح أو تاخد راحة وده طبعاً مش طبيعي لأي طالب عادي
ما تنكرش إنك كنت بتحب العلم بزيادة
أما الأخت الريسة المبجلة الشيرين مجدي فانتي مش غريب عليكي برضه الكلام ده ما إنتي زي يا علي يا قطة ... عالم دحيحة بس الدح ده كان مناسب لشخصيتك انتي وعلي ... الصحافة والإعلام والهيصة دي عايزة ناس دحيحة ومتفوقة زيكم ... أنا شايفة إنكم استثناء
ومجال شغلكم دلوقتي اعتمد على دراستكم بشكل كبير ... لكن في ناس مواهبهم بتطغي على نوع التعليم اللي بيتلقوه
وعلى العموم يا جماعة أنا مش ضد أوائل الثانوية العامة أوي بس معظمهم بصراحة برضه حفظة ودحيحة بشكل مستفز
وربنا يوفق الجميع للي فيه الخير
على فكرة يا مربم الكورس نفسه اللى بيتدرس فى الثانوية العامةالمصرية فى د ذاته كورس مفيد جدا و من أقوى المناهج اللى بتدرس فى العالم لكن المشكلة هى طريقة التدريس، و اللى بتخلى الطالب مهما كانت درجة تفوقه ينساه.
كمان مش لازم نتهم الانسان اللى ذاكر و جاب مجموع، أكيد ضحى بأوقات كان ممكن يهرج فيها لكن داس على رغباته فى مقابل انه يحقق حلم ليه...فمش فالآخر نقول انه غلط، و على فكرة الحفيظ بس عمره مابيجيب مجموع بينجح آه لكن علشان يحقق حلمه لازم يفهم، و بردو اللى بيعتمد على الفهم بس(المعظم و ليس الكل) بردو مش بيجيب مجموع الى
و آسفة للإطالة( و مدونتك لذيذة أوى)
Saloma
شكراً على تعليقك وزيارتك الأولى لمدونتي التي مازالت تحبو وسط المدونات الأخرى
بس انت متأكد إنه نفس المنهج؟؟؟
المشكلة والله يا أخ إن المنهج فاكرينه للحفظ ... الجانب العملي للشيء مهمل تماماً فالطالب يحس إنه بيصم في حاجات ملهاش علاقة بالواقع اللي إحنا عايشين فيه
لو كل حاجة بندرسها كانوا بيربطوهالنا بالواقع كنا زماننا كلنا فلحنا وحبينا التعليم
وسلمولي على وزارة علم في المتبلم
حبيت بس اثبت حضور
الله يسامح بتوع التعليم
Post a Comment