كل الناس وكل الصحف والمجلات والبرامج في بداية السنة بيكتبوا ويقولوا نفس الكلام بتاع كل سنة
السنة دي أحسن من اللي فاتت ... حصاد العام .. نفسك تعمل إيه السنة دي ومعملتهوش السنة اللي فاتت ... تحب تقول اللي زعلتهم أو فرحتهم إيه ... مين نفسك يكون موجود معاك السنة دي .. أمنيات العام .. سهرت فين ليلة راس السنة
بصراحة لو كل واحد احتفظ بالكلام ده، ممكن يعمله كوبي وبيست السنين الجاية لأنه ما بيتغيرش .. ساعات المحتوى بيتغير .. بس عامة لو ركزنا شوية حتلاقي إن أمنيات الناس متقاربة أوي
كل واحد أكيد بيتمنى ولو واحدة من الأمنيات دي
نفسي الحروب تنتهي
نفسي الأسعار تقل ... أو على الأقل تستقر
نفسي أتجوز
نفسي أخلف بيبي
نفسي أخلص مدرسة
نفسي أتخرج بتقدير كويس
نفسي أسافر اتفسح
نفسي أسافر أشتغل برة
نفسي ربنا يرزقني بشقة
نفسي يكون عندي عربية
نفسي أتعين في وظيفة محترمة
نفسي أجوز العيال
نفسي أسافر أعمل حج أو عمرة
نفسي ... نفسي ... نفسي ... الناس نفسها في حاجات كتير أوي .. يارب طبعاً تتحقق وربنا يستجيب للدعاء ده كله
بس فيه حاجة
اشمعنى الناس مستنية سنة تروح وسنة تيجي علشان يتمنوا أو يدعوا أو يغيروا من نفسهم او من حياتهم أو حتى ينتظروا من الآخرين التغيير ده ... ساعات لما بفكر في السنة الجديدة ... مابحسش بأي فرق .. مجرد كانت سبعة فوق .. وبقت سبعة تحت
ساعات أقل حافز أو أقل مناسبة ولو حتى ملهاش أساس أو أصل علشان نحتفل بيها بتكون علامة فارقة في تاريخ بني آدم من الأحسن إلى الأسوأ أو كما أتمنى السنة دي من الأحسن إلى الأسوأ
الأيام بتمر بسرعة .. بسرعة أوي ... والسنة حتمر بسرعة أوي ... محتاجين نعمل حاجات كتير قبل نهايتها
محتاجين نخطط للي بنحلم بيه .. وننفذ اللي بنخطط له .. علشان السنة دي ... الـ356 يوم كلهم ما يبقوش مجرد احتفال بانتهائهم أو بدايتهم
مش مجرد سبعة فوق .. وسبعة تحت
3 comments:
مريم
بجد عندك حق، المفروض أن طول أيام السنة والناس بتحلم وبتحاول تحقق أحلامها بالعمل.
ولكن اللي بيقرق دايما مع ولادة عام جديد أو انتهاؤه زي ما قلتي الأرقام، ولكن أي بداية بتدعو للتفاؤل عشان كده كل ده بيحصل
اشكرك على البوست الجميل
Hello. This post is likeable, and your blog is very interesting, congratulations :-). I will add in my blogroll =). If possible gives a last there on my site, it is about the CresceNet, I hope you enjoy. The address is http://www.provedorcrescenet.com . A hug.
سلام
أنا بصرحه كنت بدور على الاكل بس عجبني الموضوع ده وحبيت اعلق عليه
هو صحيح كل ايام سنه ممكن واحد يعمل فيها حاجات كثير بس يعني أول السنه له طعم ثاني ده مش معناه ان ماحدش يتمني غير أول السنه.
وبشكرك على الطبخه السويت بالخضار
Post a Comment