النهاردة افتكرت إزاي كنا بنقضي شم النسيم مع ماما وبابا لما كنا صغيرين، وإزاي كان لينا طقوس لا نحيد عنها أبداً كل سنة... لكن للأسف كل الطقوس دي توقفت بعد ما كبرنا ودخلنا الجامعة وكل واحد بقى ليه حياته الخاصة... اللي بيسافر مع صحابه واللي بيروح سينما واللي بيفضل قاعد في البيت وهكذا...
وبالرغم من كرهي للبيض المسلوق تحديداً، إلا إني كنت بكسر القاعدة دي يوم شم النسيم بس... يعني البيضة برضه بيكون شكلها مغري... وبعدين بحط عليها ملح وكمون كتير فما بحسش بطعم الصفار أوي
كنت أنا ومحمد أخويا بنتنافس مين اللي بيرسم أحلى وبيستخدم ألون أكتر على البيضة بتاعته
غالباً كنت برسم بلياتشو أو راجل بشنب بريمة أو بنت بشعر أصفر وروج أحمر.. مش عارفة ليه... وساعات كنت بخللي ماما ترسم لي وشوش وأشكال... ولما كان محمد بيلاقي البيض بتاعي شكله حلو، ساعات كان بيخليني أرسم له
المهم لما بنخلص تلوين البيض كنا بنرصه، نتفرج عليه شوية، وبعدين نكسره علشان ناكله
بعد الأكل نجري ونلبس بسرعة علشان نطلع المقطم ونشوف القاهرة من فوق في الجو الجميل ده
كنا دايماً لما نطلع المقطم أخاف أوي أقرب من الحافة أو أبص تحتنا والعربية ماشية... بحس إن إحنا ممكن نقع في أي لحظة.... وبالرغم من كده كنت بحب الرحلة دي أوووي
غالباً بعدها كنا بنروح نادي جلاء اللي كان جنب بيتنا القديم في مصر الجديدة، أو بنروح عند جدتي وجدي (آنا وجدو) في التحرير علشان نديها أكلة رنجة بالبصل والطماطم والليمون... والحمد لله من صغري عمرنا ما دخلنا الفسيخ بيتنا أبداً لأننا بنكرهه عمى وما بنطيقش ريحته خااااالص... لكن الرنجة دي حاجة تانية خالص... مزاج عالي فعلاً
أما بالنسبة للمدرسة فكانت قصة تانية... لازم كنا نحضر لشم النسيم بعمل موضوع رسم عن رحلة قمنا بها مع أسرتنا في شم النسيم... ده غير الكارت اللي لازم نعمله ونلونه بنفسنا ولازم يكون بيحتوي على رسمة بيض ملون وأرنب... وأنا كنت فاشلة نوعاً ما في رسم الأرانب بس كنت بعمل كروت تحفة وماما كانت بتعلقها على الثلاجة
النهاردة وبعد ما اتجوزت... احتفال شم النسيم مختلف تماماً
ماما وبابا مسافرين الساحل مع أصحابهم
محمد وحسين قاعدين مع آنا في البيت
أما أنا وعلي فرحنا النادي وقضينا اليوم كله هناك في الشمس والجو الجميل... الدنيا كانت مليانة ناس مش الزحمة اللي تضايق الحمد لله وبعدين رحنا لجدتي بالليل وسهرنا معاهم
السنة الجاية بإذن الله حستعد إني أرجع طقوس شم النسيم القديمة تاني... بيض مسلوق، ألوان، رنجة، وبرضه إن شاء الله حنروح برضه النادي
4 comments:
حلوة أوي الذكريات دي ....فكرتيى بأيام جميلة جدا
أصل تقريبا كل البيوت المصرية كانت بتقوم بنفس الحاجات
إن شاء الله السنة الجاية تكون أحسن و تقدري ترجعي الذكريات دي في بيتك
:)
الحلم العر بي
أشكرك جداً على تعليقك ... ويارب تكوني انتي كمان انبسطي في شم النسيم السنة دي واسترجعتي ذكرياتك القديمة والأيام الجميلة
تصدقي صحيح بعد الواحد ما بيكبر بيفقد بهجة الاعايد والمواسم دي
يعني شم نسيم مرتبط عندي بتلوين البيض بردة جدتي كانت بتسلق لي البيض واعقد انا وامي نلون مع بعض واخويا يقعد يقلد الرسومات بس البيض كان بيصعب عليا اكلة بعد مجهود التلوين
يلا رجعتينا للايام الجميلة يا مريومة
:)
سلمى
شكراً على تعليقك
والله أنا بفكر إن إحنا نحاول نرجع الطقوس بتاعة زمان دي تاني إبتداءاً من أي مناسبة جاية وكنا بنحتفل بيها بأسلوب معين... ده أكيد حيفرحنا تاني
Post a Comment